बेळगाव शहराचे सौंदर्यीकरण आणि वाहतूक कोंडीची समस्या सोडवण्यासाठी कॅन्टोन्मेंट बोर्डाच्या अधिकाऱ्यांनी आज विशेष मोहीम राबवली. नुकत्याच झालेल्या बोर्डाच्या महत्त्वपूर्ण बैठकीतील निर्णयानुसार सार्वजनिक रस्ते आणि फूटपाथवर अतिक्रमण करणाऱ्या दुकानांवर ही कारवाई करण्यात आली.

शहरात नागरिक आणि वाहनधारकांना होणारा त्रास लक्षात घेऊन ही व्यापक मोहीम हाती घेण्यात आली होती. पहिल्या टप्प्यात टिळकवाडी येथील पहिल्या रेल्वे गेट परिसरातील रस्त्यांच्या कडेला असलेली अनधिकृत बांधकामे आणि दुकाने हटवण्यात आली. नागरिकांच्या वावरण्यास अडथळा ठरणारे सर्व तात्पुरते शेड यावेळी पाडण्यात आले.

टिळकवाडी येथील कारवाईनंतर अधिकाऱ्यांच्या पथकाने बेळगाव मध्यवर्ती बस स्थानक परिसरामध्येही मोहीम राबवली. बस स्थानकाचे मुख्य रस्ते आणि पद्यपथ व्यापणाऱ्या व्यापाऱ्यांना अधिकाऱ्यांनी कडक सूचना दिल्या. यापुढे सार्वजनिक जागा, रस्ते किंवा फूटपाथवर अतिक्रमण केल्यास कायदेशीर कारवाई करण्याचा इशारा अधिकाऱ्यांनी दिला आहे.