लव्ह जिहादच्या छळाला कंटाळून धारवाड तालुक्यातील गरग गावात एका अल्पवयीन मुलीने आत्महत्या केल्याची धक्कादायक घटना घडली आहे. या पार्श्वभूमीवर केंद्रीय मंत्री प्रल्हाद जोशी आणि माजी आमदारांनी पीडित कुटुंबाची भेट घेऊन त्यांचे सांत्वन केले.

केंद्रीय मंत्री प्रल्हाद जोशी यांनी पीडित कुटुंबाची भेट घेऊन त्यांना धीर दिला. या प्रकरणात केवळ सीपीआय यांच्या निलंबनावर न थांबता, घटना घडली त्या वेळी कर्तव्यावर असलेल्या पीएसआय यांच्यावरही कडक कारवाई झाली पाहिजे, अशी मागणी त्यांनी केली. पोलीस पैसे घेऊन तडजोड करत असल्याचा संतप्त आरोप करत त्यांनी आतापर्यंत झालेल्या कारवाईचा जाब घटनास्थळी उपस्थित पोलीस अधीक्षकांकडे विचारला.

यावर, प्रकरणातील दोन आरोपींना अटक करून दोषी पोलीस अधिकाऱ्याला निलंबित केल्याची माहिती पोलीस अधीक्षक गुंजन आर्य यांनी दिली.

संबंधित पीएसआयवर तातडीने कारवाई करून दोषी पोलिसांवर ॲट्रॉसिटी अंतर्गत गुन्हा दाखल करण्याची सूचना प्रल्हाद जोशी यांनी केली. आम्ही खंबीरपणे तुमच्या पाठीशी असून आरोपींना कठोर शिक्षा मिळवून देऊ, असे आश्वासन प्रल्हाद जोशी यांनी दिले. या घटनेमुळे संपूर्ण परिसरात तीव्र संताप व्यक्त होत असून पोलिसांच्या भूमिकेवर प्रश्नचिन्ह निर्माण झाले आहे.