मुख्यमंत्री पदावरून सिद्धरामय्यांच्या राजीनाम्यामुळे २०२८ च्या निवडणुकीत काँग्रेसला मोठा फटका बसेल, असे आमदार बसनगौडा पाटील यत्नाळांनी म्हटले आहे. विजापूरमध्ये प्रसारमाध्यमांशी बोलताना त्यांनी ही प्रतिक्रिया दिली.

कोणतेही ठोस कारण नसताना सिद्धरामय्यांची गच्छंती करण्यात आली आहे. हा कुरुबा समाजावर झालेला अन्याय असून यामुळे समाज बांधवांमध्ये तीव्र संताप आहे, असे बसनगौडा पाटील यत्नाळांनी सांगितले. या राजकीय घडामोडींचा फायदा पुढील विधानसभा निवडणुकीत थेट विरोधी पक्षांना होईल, असा दावा त्यांनी केला.

काँग्रेस नेते राहुल गांधी नेहमी मागासवर्गीयांच्या हक्कांबद्दल बोलतात, मात्र आता मागासवर्गीय नेते कुठे आहेत, असा सवाल बसनगौडा पाटील यत्नाळांनी उपस्थित केला. सिद्धरामय्यांच्या राजीनाम्यामुळे दलित समाजावरही अन्याय झाला असल्याचे त्यांनी नमूद केले.

सिद्धरामय्यांनी नेहमीच एका विशिष्ट वर्गाचे लाड केले, मात्र आज त्यांच्या समर्थनार्थ एकही अल्पसंख्याक नेता पुढे आलेला नाही, असे बसनगौडा पाटील यत्नाळांनी म्हटले. शेवटी, सिद्धरामय्यांच्या निरोपाच्या वेळी मी जास्त टीका करणार नाही, त्यांना पुढील वाटचालीस शुभेच्छा, असे म्हणत त्यांनी आपल्या वक्तव्याचा समारोप केला.