बागलकोट तालुक्यातील तुळसिगेरीमध्ये मध्यरात्री रेशन तांदळाच्या अवैध वाहतुकीचा प्रकार स्थानिक नागरिकांनी उघडकीस आणला. या प्रकरणात पोलिसांच्या नोंदीतील ठिकाण बदलल्याने संशय व्यक्त होत असून संबंधित अधिकाऱ्यांच्या भूमिकेबाबतही प्रश्न उपस्थित केले जात आहेत.

तुळसिगेरीमध्ये मध्यरात्री साडेएकच्या सुमारास आलेल्या बोलेरो पिकअप वाहनावर स्थानिकांना संशय आला. नागरिकांनी तत्काळ वाहनाची तपासणी केली असता त्यामध्ये 14 पोत्यांत पाच क्विंटलपेक्षा अधिक रेशन तांदूळ आढळून आला. त्यानंतर वाहन पोलिसांच्या ताब्यात देण्यात आले.

या प्रकरणी कलादगी पोलीस ठाण्यात गुन्हा दाखल करण्यात आला आहे. मात्र प्रकरण मागे घेण्यासाठी दबाव टाकला जात असल्याचा आरोप स्थानिकांकडून करण्यात येत आहे.

घटना गावातील मंदिराजवळ घडली असताना पोलिसांनी दाखल केलेल्या एफआयआरमध्ये केशव सिमेंट कारखान्याजवळ तांदूळ जप्त केल्याचा उल्लेख करण्यात आल्याने नागरिकांमध्ये संशय वाढला आहे.

या संपूर्ण प्रकरणामागे स्थानिक फूड इन्स्पेक्टरचा सहभाग असल्याची शंका व्यक्त केली जात असून सखोल चौकशीची मागणी नागरिकांकडून करण्यात येत आहे.