खानापूर तालुक्यातील नंदगड पोलीस ठाण्याचे जनस्नेही पोलीस उपनिरीक्षक बादामी हे सेवानिवृत्त झाले आहेत. या पार्श्वभूमीवर खानापूर बार असोसिएशन तसेच ब्लॉक काँग्रेसचे अध्यक्ष ईश्वर घाडी यांच्या वतीने बादामी यांचा सन्मानपूर्वक सत्कार करून त्यांना निरोप देण्यात आला.

नंदगड पोलीस ठाण्यामध्ये सुमारे दोन वर्षे अत्यंत कार्यक्षमतेने सेवा बजावून निवृत्त होत असलेले पीएसआय बादामी यांच्यासाठी या भव्य निरोप समारंभाचे आयोजन करण्यात आले होते. कायद्याच्या चौकटीत राहून आणि जनतेशी आपुलकीचे नाते निर्माण करून त्यांनी नागरिकांची मने जिंकली होती, असा सूर या वेळी मान्यवरांनी आळवला.

या कार्यक्रमात उपस्थित राहिलेले वकील आणि काँग्रेस नेते ईश्वर घाडी यांनी पीएसआय बादामी यांच्या कार्यशैलीचा गौरव केला. पोलीस ठाण्यात अडचणी घेऊन येणाऱ्या सामान्य नागरिकांना अत्यंत प्रेमाने आणि आदराने वागणूक देत बादामी यांनी जनस्नेही अधिकारी म्हणून घराघरांमध्ये ओळख निर्माण केली होती, अशी प्रतिक्रिया ईश्वर घाडी यांनी दिली.

याच समारंभादरम्यान नूतन प्रशिक्षणार्थी पीएसआय महानंदा यांचाही सत्कार करून त्यांना पुढील वाटचालीसाठी प्रोत्साहन देण्यात आले. या कार्यक्रमाला ज्येष्ठ काँग्रेस नेते मोहम्मद इक्बाल बसरीकट्टी, इम्रान चांदवाले, वहाब बसरीकट्टी यांच्यासह परिसरातील अनेक प्रमुख नागरिक आणि पोलीस कर्मचारी उपस्थित होते.