जिलेटिन कांडी सापडलेल्या ठिकाणी टायमरही मिळून आल्याने या प्रकरणाचा सखोल तपास केला जात आहे. हे गांभीर्य लक्षात घेऊन या प्रकरणाचा तपास आता एनआयएकडे सोपवण्यात येणार असल्याची माहिती गृहमंत्री जी. परमेश्वर यांनी दिली.

बेंगळुरूमध्ये सदाशिवनगर येथील आपल्या निवासस्थानी प्रसारमाध्यमांशी बोलताना त्यांनी ही माहिती दिली. “बॉम्बची धमकी देणाऱ्या व्यक्तीला पोलिसांनी आधीच अटक केली असून त्याची चौकशी सुरू आहे. घटनास्थळी सापडलेली जिलेटिन कांडी आणि इतर सर्व पुरावे तपासासाठी ताब्यात घेण्यात आले आहेत,” असे जी. परमेश्वर यांनी सांगितले.

पुढील तपासाबाबत बोलताना गृहमंत्री म्हणाले की, एनआयएच्या अधिकाऱ्यांनीही या प्रकरणात रस दाखवला आहे, त्यामुळे आम्ही हा तपास त्यांच्याकडे सोपवत आहोत. पंतप्रधानांच्या कार्यक्रमांसाठी नेहमीच उच्चस्तरीय सुरक्षा व्यवस्था असते. राज्य आणि केंद्रीय सुरक्षा संस्था समन्वयाने काम करत असतात. पंतप्रधान येण्यापूर्वी दोन तास आधीच जिलेटिन कांडी शोधून काढणे, हे पोलिसांचे कौतुकास्पद काम आहे. या घटनेचा दहशतवादी संघटनांशी काही संबंध आहे का, हे तपासाअंतीच स्पष्ट होईल, असे जी. परमेश्वर यांनी स्पष्ट केले.

शृंगेरी विधानसभा निकालाबाबत भाष्य करताना गृहमंत्री म्हणाले की, या प्रकरणातील न्यायालयाचा निकाल महत्त्वाचा ठरेल. फेरमतमोजणीत २५० मते जास्त येणे हे मतमोजणीत त्रुटी असल्याचेच लक्षण आहे, त्यामुळे दोषी अधिकाऱ्यांवर कारवाई होणे आवश्यक आहे. सध्या सर्वोच्च न्यायालयाने मूळ मतमोजणीलाच ग्राह्य धरून स्थगिती दिली असली, तरी मतदानातील फेरफार संदर्भात राज्य पोलीस आणि फॉरेन्सिक लॅब द्वारे सखोल तपास सुरू असल्याचे त्यांनी स्पष्ट केले.