सदलगा पोलीस ठाण्यातील दरोड्याच्या गुन्ह्यातील आरोपीला स्थळ पाहणीसाठी कोल्हापूरला नेले असता बेळगाव पोलिसांवर हल्ल्याचा प्रयत्न झाला. आरोपीचे नातेवाईक आणि स्थानिकांनी पोलिसांना घेरल्याने तणाव निर्माण झाला होता, मात्र पोलीस यातून सुखरूप बाहेर पडले आहेत.

सदलगा पोलीस ठाण्यात नोंद असलेल्या दरोड्याच्या प्रकरणातील आरोपी धीरज वाळवाळकर आणि रवी सोनार यांना चिक्कोडी पोलिसांनी अटक केली होती. तपासाचा भाग म्हणून स्थळ पाहणीसाठी या आरोपींना कोल्हापूरमधील छत्रपती शिवाजी नगर येथे नेण्यात आले होते. यावेळी आरोपीने आपण निर्दोष असल्याचे ओरडत गोंधळ घालण्यास सुरुवात केली. हे पाहून आरोपीचे नातेवाईक आणि मित्रांनी एकत्र येत चिक्कोडीचे सीपीआय विश्वनाथ चौगला आणि त्यांच्या कर्मचाऱ्यांवर हल्ल्याचा प्रयत्न केला. हे पोलीस बनावट असल्याचे सांगून आरोपीने संपूर्ण कॉलनीतील लोकांना चिथावणी दिली, ज्यामुळे तिथे गंभीर परिस्थिती निर्माण झाली होती.

परिस्थिती हाताबाहेर जात असल्याचे पाहून चिक्कोडी पोलिसांनी तातडीने स्थानिक महाराष्ट्र पोलिसांशी संपर्क साधला. स्थानिक पोलिसांच्या कडक बंदोबस्तात आरोपीला पुन्हा ताब्यात घेऊन येण्यात पोलिसांना यश आले. कर्तव्यात अडथळा आणून पोलिसांवर हल्ला करण्याचा प्रयत्न करणाऱ्या आरोपीच्या कुटुंबीयांच्या या कृत्यामुळे पोलीस वर्तुळात मोठी चर्चा सुरू झाली आहे. सध्या पोलीस सुखरूप परतले असून पुढील कायदेशीर प्रक्रिया सुरू आहे.