धारवाड तालुक्यातील लखमापूर गावातील ऐतिहासिक बसवण्णा मंदिरात चोरांनी डल्ला मारून दीड किलो चांदीचे दागिने लंपास केले आहेत. मंदिराचे कुलूप तोडून चोरांनी हे कृत्य केल्याने परिसरात भीतीचे वातावरण निर्माण झाले आहे.

लखमापूर गावाच्या वेशीवर असलेल्या या ऐतिहासिक बसवण्णा मंदिराच्या दरवाजाचे कुलूप तोडून चोरांनी आत प्रवेश केला. चोरांनी बसवेश्वराच्या मूर्तीवर असलेले सुमारे १२०० ग्रॅम वजनाचे चांदीचे दागिने लंपास करून तिथून पोबारा केला. नेहमीप्रमाणे पहाटे भाविक पूजेसाठी आले असता त्यांना मंदिराचे कुलूप तुटलेले दिसले, त्यानंतर हा सर्व प्रकार उघडकीस आला.

घटनेची माहिती मिळताच गरग पोलीस ठाण्याचे निरीक्षक शिवयोगी लोहार यांनी घटनास्थळी भेट देऊन पाहणी केली. चोरांचा शोध घेण्यासाठी श्वानपथकाला पाचारण करण्यात आले असून, परिसरातील सीसीटीव्ही फुटेजची तपासणी केली जात आहे. “याप्रकरणी गुन्हा दाखल करण्यात आला असून चोरांच्या अटकेसाठी विशेष मोहीम राबवली जात आहे,” अशी माहिती पोलीस निरीक्षक शिवयोगी लोहार यांनी दिली.

मंदिराच्या परिसरात कोणीही नसताना चोरांनी संधी साधून हे कृत्य केल्याचा संशय पोलिसांनी व्यक्त केला आहे. या चोरीच्या घटनेमुळे ग्रामस्थांमध्ये तीव्र संताप व्यक्त होत असून गरग पोलीस अधिक तपास करत आहेत.