आई-वडिलांना भाजी विक्रीच्या व्यवसायात मदत करत असतानाच धारवाडमधील दोन विद्यार्थ्यांनी दहावीच्या परीक्षेत घवघवीत यश संपादन केले आहे. अत्यंत प्रतिकूल परिस्थितीवर मात करत या विद्यार्थ्यांनी मिळवलेल्या गुणांमुळे त्यांचे सर्वत्र कौतुक होत असून इतर विद्यार्थ्यांसाठी ते प्रेरणास्थान ठरले आहेत.

धारवाडमधील कल्याण नगर येथील रस्त्यावर भाजीपाला विकणाऱ्या कुटुंबातील दोन विद्यार्थ्यांनी दहावीच्या परीक्षेत अनुक्रमे ८२ आणि ८६ टक्के गुण मिळवून यशाचे शिखर गाठले आहे. रोज पहाटेपासून रात्री उशिरापर्यंत आई-वडिलांना भाजी विकण्यास मदत करून, मिळालेल्या वेळेत अत्यंत निष्ठेने अभ्यास करत धारवाडच्या के. ई. बोर्ड इंग्लिश मीडियम स्कूलचा विद्यार्थी नीलकंठ तिप्पण्णा पट्टेदार याने ८२.५६ टक्के गुण मिळवले आहेत.

त्याचप्रमाणे नीलकंठचा भाचा आणि धारवाड तालुक्यातील करडिगुड्डा येथील कर्नाटक पब्लिक स्कूलचा विद्यार्थी बसवराज गुरप्पा अंगडी याने ८६ टक्के गुण मिळवून घवघवीत यश संपादन केले आहे. आपल्या मुलाने आणि भाच्याने मिळवलेल्या या यशामुळे पालकांनी आनंद व्यक्त करत पेढे भरवून जल्लोष केला.

आमच्या मुलांनी गरिबीवर मात करत उत्तम गुण मिळवले आणि आमची मान अभिमानाने उंचावली आहे, अशी भावना हेमा आणि तिप्पण्णा पट्टेदार या पालकांनी व्यक्त केली.