धारवाड तालुक्यातील मन्सूर गावात गुरुवारी रात्री उशिरा बिबट्या दिसल्याची दुसरी घटना घडली असून, बिबट्याने गाईच्या वासरावर हल्ला करून त्याला ठार केले आहे. शेतात बिबट्याच्या पायाचे ठसे आढळून आले असून, त्यामुळे मन्सूर, मनगुंडी, बेळ्ळीगट्टीसह परिसरातील ग्रामस्थ चिंतेत आहेत.

धारवाड तालुक्यातील मन्सूर गावाजवळ दिसलेल्या बिबट्याने गावातील करेम्मा मंदिराजवळ बांधलेल्या गाईच्या वासरावर हल्ला केला. बिबट्याच्या हल्ल्यात एका वासराचा मृत्यू झाला आहे. हे वासरू कुबेरप्पा मडिवाळर या शेतकऱ्याचा मालकीचे आहे. बिबट्याच्या हल्ल्याची माहिती मिळताच मंदिराजवळ जमलेल्या ग्रामस्थांनी मोठी चिंता व्यक्त केली. हाच बिबट्या तीन दिवसांपूर्वी धारवाड येथील कर्नाटक विद्यापीठाच्या मागे दिसल्याचे सांगण्यात आले.

आता तो पुन्हा धारवाडच्या हद्दीत दिसू लागल्याने वनविभागाच्या अधिकाऱ्यांनी कारवाई करून लोकांचे प्राण वाचविण्याचा प्रामाणिक प्रयत्न करावा, अशी मागणी ग्रामस्थांनी केली आहे. सध्या ग्रामस्थांच्या माहितीवरून वनविभागाच्या अधिकाऱ्यांनी गावाला भेट देऊन बिबट्याचा शोध सुरू केला आहे. दरम्यान, याबाबत कुबेरप्पा मडिवाळर यांनी इन न्यूजला घटनेबाबत माहिती दिली.