बेळगाव जिल्हा हॉकी संघटना (बीडीएचए)ने आयोजित केलेल्या 6 ए साईड मेजर ध्यानचंद स्मृती हॉकी स्पर्धेत सेंट जॉन्स, जी. जी. चिटणीस आणि एम. आर. भंडारी स्कूल या संघांनी विविध गटांत विजय मिळवला.

बीडीएचएने बेळगावातील कॅम्प हॉकी मैदानावर आयोजित केलेल्या मेजर ध्यानचंद स्मृती आंतरशालेय हॉकी स्पर्धेत एकूण 12 संघांनी भाग घेतला. स्पर्धेत सेंट जॉन्स ज्युनियर मुलींच्या गटात विजेती ठरली. तर जी. जी. चिटणीस ज्युनियर मुलींच्या गटात उपविजेती ठरली. ज्युनियर बॉईज गटातही सेंट जॉन्सनेच विजेतेपद पटकावले. तर उपविजेतेपद एम. आर. भंडारी स्कूलने पटकावले.
एम. आर. भंडारीने सिनियर बॉईज गटात विजेतेपद पटकावले. तर एम. आर. भंडारीच्याच बी टीमने
उपविजेते पटकावले. विजेत्या व उपविजेत्या संघांना पाहुण्यांच्या हस्ते चषक व पुरस्कार देऊन गौरविण्यात आले.

यावेळी प्रमुख पाहुणे म्हणून बीडीएचएचे उपाध्यक्ष व कॅन्टोमेंट बोर्ड बेळगावचे माजी उपाध्यक्ष साजीद शेख, खजिनदार एम. बी. नदाफ, गोपाल खाड्ये, खलिक बेपारी, जहागीरदार सर, तेरणेकर सर, उत्तम सिंदाई, गणपत कडोलकर, राजशेखर मोतीबेन्नूर, चाळकाई, रंगराज सर, शकील कोतवाल, इब्राहिम शेख, शहाबाज कब्बी आणि समीउल्ला नाईक आदी उपस्थित होते.