चित्रदुर्ग तालुक्यातील मल्लापूरजवळ आज सकाळी झालेल्या अपघातात चार जणांचा मृत्यू झाला तर तीन जण गंभीर जखमी झाल्याची माहिती आहे. मृत आणि जखमी बेळगावातील अनगोळ परिसरातील असल्याचे समजते.
चित्रदुर्ग जिल्ह्यात आज पहाटेच्या सुमारास एक दुःखद घटना घडली. राष्ट्रीय महामार्गावर होस्पेटहुन तुमकूरला जात असताना उभ्या असलेल्या ट्रकला भरधाव कार आदळल्याने भीषण दुर्घटना घडली. या अपघातात कारचा चक्काचूर झाला असून चौघांचा जागीच मृत्यू झाला आहे. या दुःखद घटनेत तीन जण गंभीर जखमी झाले असून त्यांना रुग्णालयात दाखल करण्यात आले आहे.
वृत्त समजताच चित्रदुर्ग ग्रामीण पोलिसांनी घटनास्थळी धाव घेऊन तपास केला. या अपघाताबाबत चित्रदुर्ग ग्रामीण पोलिस ठाण्यात गुन्हा दाखल करण्यात आला आहे. होस्पेट बाजूने तुमकूरला जात असताना हा अपघात झाला. शमशुद्दीन (40), मल्लिका (37), खलील (42) आणि तबरेज (13) अशी मृतांची नावे आहेत. एसपी धर्मेंद्र कुमार यांनी माहिती दिली की, गंभीर जखमी नर्गिस, रेहान आणि रेहमान यांना जिल्हा रुग्णालयात दाखल करण्यात आले आहे.
दरम्यान, अपघातातील सर्व मृत आणि जखमी बेळगावातील अनगोळ येथील रहिवासी असल्याचे समजते. याबाबत आणखी तपशील हाती यावयाचा आहे.