उसाला योग्य दर मिळावा आणि थकीत बिले तातडीने अदा करावीत, या मागणीसाठी शेतकऱ्यांचे आंदोलन तीव्र झाले आहे. गुर्लापूरहून बेळगावच्या हिंडलगा कारागृहापर्यंत काढण्यात आलेल्या ‘जेल चलो’ पदयात्रेच्या पार्श्वभूमीवर शेकडो शेतकऱ्यांनी कारागृहासमोर घेराव घालून आंदोलन केले.

बेळगाव तालुक्याच्या बाहेरील भागात असलेल्या हिंडलगा मध्यवर्ती कारागृहासमोर शेतकरी नेते किशन नंदी यांच्या नेतृत्वाखाली शेकडो शेतकरी एकत्र आले. पोलिसांनी खबरदारी म्हणून कारागृह परिसरात बॅरिकेड्स लावून कडेकोट बंदोबस्त ठेवला होता. मात्र, संतप्त शेतकऱ्यांनी कारागृहाच्या प्रवेशद्वारासमोरील रस्त्यावर ठिय्या देत सरकार आणि साखर कारखानदारांविरोधात घोषणाबाजी केली.यावेळी पोलिसांशी शेतकऱ्यांची वादावादी झाली.

मागील बैठकीत उसाला प्रतिटन ४८ रुपये दर निश्चित करण्यात आला होता. सध्या सरकारच्या निविदेत प्रतिटन ५४ रुपये दर असतानाही शेतकऱ्यांना केवळ ५० रुपये दिले जात असल्याचा आरोप आंदोलकांनी केला. प्रतिटन उसाच्या बिलापोटी केवळ चार हजार रुपये देऊन शेतकऱ्यांची फसवणूक केली जात असल्याचा दावा करत किमान ५४ रुपयांप्रमाणे संपूर्ण रक्कम तातडीने अदा करावी, अशी मागणी त्यांनी केली. पोलिसांनी आंदोलकांना रोखण्याचा प्रयत्न केला असता शेतकऱ्यांनी बॅरिकेड्स ढकलण्याचा प्रयत्न केला. यावेळी पोलिस आणि आंदोलकांमध्ये तीव्र वादावादी झाली.

दुसरीकडे, शेतकरी आंदोलनाचे प्रमुख नेते चून्नप्पा पुजारी आणि शशिकांत गुरूजी यांच्या नेतृत्वाखाली गुर्लापूर येथून हजारो शेतकऱ्यांनी बेळगावच्या दिशेने पदयात्रा सुरू केली. उसाची बिले अदा करणे आणि न्याय्य दर निश्चित करणे या बाबतीत सरकार अपयशी ठरल्याचा आरोप शेतकरी नेते चून्नप्पा पुजारी यांनी केला.

उसाला एसएपी निश्चित करण्याबाबत माध्यमे आणि शेतकरी वारंवार प्रश्न उपस्थित करत असतानाही राज्य सरकारचे मंत्री केंद्र सरकारकडे बोट दाखवून जबाबदारी टाळत असल्याची टीका त्यांनी केली.

शेतकऱ्यांनी दरवर्षी पीक घ्यावे, मात्र दर आठ दिवसांनी आर्थिक संकटात सापडून त्यांचे संसार कोलमडू नयेत. साखर कारखानदार आणि राज्य सरकारने तातडीने सकारात्मक भूमिका घेऊन शेतकऱ्यांना न्याय द्यावा, अशी मागणी त्यांनी केली. अन्यथा बेळगाव जिल्ह्यातील ५० लाखांहून अधिक नागरिकांना संघटित करून सुवर्ण विधानसौधला घेराव घालण्यात येईल आणि तीव्र आंदोलन छेडले जाईल, असा इशाराही त्यांनी दिला.