माजी मुख्यमंत्री जगदीश शेट्टर यांना भाजपने प्रथम पसंतीचे तिकीट द्यायला हवे होते. पण, दिले नाही. जगदीश शेट्टर जेडीएसमध्ये आले तर आम्ही त्यांना हुबळी आणि धारवाड मध्य मतदारसंघासाठी तिकीट देऊ, असे सांगत जेडीएसचे जिल्हाध्यक्ष गुरुराज हुनसीमरद यांनी शेट्टर यांना पक्षात येण्याची ऑफर दिली आहे.

पत्रकारांशी बोलताना हुनसीमरद म्हणाले की, भाजपने पहिली यादी जाहीर केल्यानंतर अनेक जण राजीनामे देत आहेत. लिंगायत समाजाचे नेते शेट्टर यांना भाजपने पहिल्या यादीत तिकीट द्यायला हवे होते. मात्र, भाजपने त्यांना तिकीट न देऊन त्यांचा अपमान केला. शेट्टर यांनी जेडीएसमध्ये यावे. पक्षाच्या हायकमांडशी बोलून त्यांना तिकीट देऊ, असे ते म्हणाले.

भाजपच्या पहिल्या यादीतून आरएसएसचा रंग दिसत आहे. ते सर्व आवश्यकतेनुसार वापरले गेले आहेत. भाजप पक्ष ज्याला वाटेल त्याला तिकीट देत आहे. गुजरात मॉडेल इथे चालत नाही. येथे नेत्यांचा स्वतःचा करिष्मा आहेत. भाजपने त्यांची फसवणूक केल्याचे ते म्हणाले.