बेंगळूर ते काशी या मार्गावर लवकरच नवीन रेल्वेसेवा सुरु होणार आहे. पंतप्रधान नरेंद्र मोदी यांच्याहस्ते या रेल्वेसेवेचे उदघाटन करण्यात येणार असल्याची माहिती धर्मादाय मंत्री शशिकला जोल्ले यांनी दिली.

चिक्कोडी तालुक्यातील हिरेकोडी ग्रापं हद्दीतील टांगाकोडी येथील कट्टीकर शिवारात श्री बिरेश्वर देवस्थान कामासाठी भूमिपूजन केल्यानंतर बोलताना मंत्री शशिकला जोल्ले यांनी सांगितले की, कर्नाटकातून अनेक भक्त काशीला देवदर्शनासाठी जातात. त्या भक्तांना राज्य सरकारकडून ५ हजार रुपये सवलत देण्यात येईल. लवकरच ही योजना सुरु करण्यात येईल. त्याचप्रमाणे बेंगळूर ते काशी या मार्गावर लवकरच नवीन रेल्वेसेवा सुरु होणार आहे. पंतप्रधान नरेंद्र मोदी यांच्याहस्ते या रेल्वेसेवेचे उदघाटन करण्यात येईल असे त्यांनी सांगितले. श्री बिरेश्वर देवाच्या कृपेने माझी व खा. अण्णासाहेब जोल्ले यांची राजकीयदृष्ट्या चांगली प्रगती झाली आहे. धर्मादाय, हाज आणि वक्फ खाते मला मिळाले हे माझे भाग्य आहे असेही मंत्री शशिकला जोल्ले यांनी यावेळी सांगितले.

यावेळी ग्रापं उपाध्यक्षा अनिता देवडकर, अण्णासाहेब गावडे, सुभाष चौगला, रेवय्या हिरेमठ, धुळु मोळके, राजाराम भोसले, अण्णाप्पा यमगर, भरत देवडकर, सुरेश दिन्नीमणी, करेप्पा दिन्नीमणी, अशोक टोन्ने, सुरेश माळी आदी उपस्थित होते.