विजापूर जिल्ह्यात भीमा तीरावर अनेक पाळीव जनावरांचा फडशा पाडून दहशत निर्माण केलेल्या बिबट्याचा विजेच्या धक्क्याने मृत्यू झाला. विजापूर जिल्ह्यातील सिंदगी तालुक्यातील देवरनावदगी गावातील उसाच्या फडात या बिबट्याचे वास्तव्य होते. शनिवारी रात्री बसवराज पाटील नामक शेतकऱ्याच्या शेताजवळील विजेचा ट्रान्सफॉर्मरवरून उडी मारण्याच्या प्रयत्नात विजेचा धक्का लागल्याने बिबट्या गतप्राण झाला. गेल्या महिन्याभरात या बिबट्याने सुमारे दहा जनावरांची शिकार करून शेतकऱ्यांत भीती निर्माण केली होती. त्यामुळे नुकसानग्रस्त झालेल्या शेतकऱ्यांनी या बिबट्याला पकडण्याची मागणी केली होती. त्यामुळे वन खात्याने उसाच्या फडात सीसीटीव्ही कॅमेरे आणि पिंजरा लावला होता. बिबट्याच्या मृत्यूमुळे शेतकऱ्यांनी मात्र सुटकेचा निश्वास सोडला आहे.