बळ्ळारी जिल्ह्यातील संदूर तालुक्यात स्वामीहळ्ळी गावाजवळ भरधाव ट्रकने दुचाकीला मागून धडक दिल्याने झालेल्या अपघातात एका तरुणाचा जागीच मृत्यू झाला, तर अन्य एक जण गंभीर जखमी झाला.

चोरनूर येथील रवीचंद्र (२८) असे मृताचे नाव असून, दुचाकीवर मागे बसलेला लोकेश गंभीर जखमी झाला आहे. दोघेही देवगिरी गावातून स्वामीहळ्ळीकडे जात असताना मागून आलेल्या ट्रकने त्यांच्या दुचाकीला धडक दिली.

धडकेनंतर दुचाकीवरील नियंत्रण सुटल्याने रवीचंद्र ट्रकच्या चाकाखाली सापडला. त्याचा जागीच मृत्यू झाला. जखमी लोकेशला तातडीने जवळच्या रुग्णालयात दाखल करण्यात आले असून, त्याच्यावर उपचार सुरू आहेत.

या प्रकरणी संदूर पोलीस ठाण्यात गुन्हा दाखल करण्यात आला आहे. अपघातानंतर घटनास्थळावरून पसार झालेल्या ट्रकचालकाचा पोलीस शोध घेत आहेत.