बेळगाव येथील काकतीवेस येथील कर्नाटक पब्लिक स्कूल (सरदार हायस्कूल) आवारात नवीन वर्ग खोल्या आणि अत्याधुनिक प्रयोगशाळांचा भव्य उद्घाटन सोहळा पार पडला.

सार्वजनिक बांधकाम मंत्री सतीश जारकीहोळी यांच्या प्रयत्नातून मंजूर झालेल्या ५ कोटी रुपये खर्चाच्या १६ नवीन वर्ग खोल्यांचे भूमिपूजन पार पडले. तसेच बेळगाव उत्तरचे आमदार आसिफ शेठ यांच्या पुढाकाराने स्मार्ट सिटी योजनेअंतर्गत ३.०४ कोटी रुपये खर्चाच्या रोबोटिक, लँग्वेज आणि व्हर्च्युअल लॅबचे उद्घाटन करण्यात आले. आमदार आसिफ शेठ, उपमहापौर हनुमानत कांगाली आणि जिल्हाधिकारी मोहम्मद रोशन यांच्या हस्ते हे लोकार्पण पार पडले.

शाळा आणि कॉलेज स्तरावरच विद्यार्थ्यांना कृत्रिम बुद्धिमत्ता (AI) आणि रोबोटिक्स तंत्रज्ञानाची ओळख करून देणे हा या लॅबचा मुख्य उद्देश आहे. येथे विद्यार्थी कोडिंग शिकून सहजपणे रोबोट तयार करू शकणार आहेत. याशिवाय इयत्ता ६ वी ते १० वीच्या विद्यार्थ्यांसाठी ३D आणि व्हर्च्युअल रियॅलिटीच्या (VR) माध्यमातून धडे समजून घेण्यासाठी ‘इमर्सिव्ह लर्निंग लॅब’ देखील तयार करण्यात आली आहे.

या कार्यक्रमाला नगरसेवक, शिक्षण अधिकारी लीलावती हिरेमठ आणि इतर मान्यवर उपस्थित होते.