बेळगाव शहर आणि परिसरात सीसीबी आणि स्थानिक पोलीस ठाण्याच्या पथकाने संयुक्तपणे राबवलेल्या मोहिमेत गांजा, मटका चिठ्ठ्या आणि बेकायदेशीर दारू जप्त करण्यात आली आहे.

बेकायदेशीर कृत्यांविरुद्ध कठोर पावले उचलत पोलिसांनी एकाच दिवसात तीन वेगवेगळ्या कारवायांमध्ये तीन आरोपींना अटक केली आहे. बेळगाव शहरातील रामतीर्थ नगर येथील केएससीए मैदानाजवळ ऑटो रिक्षातून गांजा विक्री करण्याचा प्रयत्न करणाऱ्या अख्तर युसूफ शेख याला सीसीबी पोलिसांनी अटक केली आहे. त्याच्याकडून ५५,००० रुपये किमतीचा १ किलो १४८ ग्रॅम गांजा आणि २०,००० रुपये किमतीची ऑटो रिक्षा जप्त करण्यात आली आहे. दुसऱ्या कारवाईत, देवगिरी गावातील स्मशानाजवळ मटका जुगार चालवणाऱ्या भरमप्पा वैजू कुंबरगी याला काकती पोलीस ठाण्याच्या पथकाने छापा मारून रोकड व मटका साहित्यासह ताब्यात घेतले.

तसेच चंदूर गावातील होळेम्मादेवी ढाब्याजवळ विनापरवाना बेकायदेशीर दारू विक्री करणाऱ्या बाळप्पा द्यामाप्पा निट्टूर याला मारीहाळ पोलिसांनी अटक करून ८८ व्हिस्कीचे टेट्रा पॅक जप्त केले आहेत. या सर्व प्रकरणांत माळमारुती, काकती आणि मारीहाळ पोलीस ठाण्यात पुढील तपास सुरू असून, यशस्वी कारवाई करणाऱ्या अधिकारी व कर्मचाऱ्यांचे बेळगाव पोलीस आयुक्तांनी कौतुक केले आहे.