महाराष्ट्रातील कोकण परिसर आणि पाणलोट क्षेत्रात होत असलेल्या सततच्या पावसामुळे चिकोडी तालुक्यातील कृष्णा नदीच्या पाणीपातळीत वाढ झाली असून येडूर-कल्लोळ पूल या पावसाळ्यात तिसऱ्यांदा पाण्याखाली गेला आहे.

महाराष्ट्रातून कल्लोळजवळ कृष्णा नदीत सध्या ४७ हजार क्युसेक वेगाने पाण्याचा विसर्ग सुरू आहे. नदीतील आवक वाढल्याने एकाच दिवसात पाणीपातळीत तब्बल ३ फुटांनी वाढ झाली असून पूल पूर्णपणे पाण्याखाली गेला आहे. खबरदारीचा उपाय म्हणून पुलावरील वाहन आणि नागरिकांची वाहतूक पूर्णपणे बंद करण्यात आली आहे.

आज श्रावण महिन्याचा पहिला सोमवार असल्याने प्रसिद्ध येडूर श्री वीरभद्रेश्वर मंदिरात दर्शनासाठी राज्यातील विविध भागांतून हजारो भाविक दाखल होत आहेत. मात्र, पूल पाण्याखाली गेल्याने मंदिरात पोहोचण्यासाठी भाविकांना अडचणींचा सामना करावा लागत आहे.

पूल बंद झाल्यामुळे भाविक आणि नागरिकांना येडूर क्षेत्राकडे जाण्यासाठी अंकली मार्गे पर्यायी रस्त्याचा वापर करावा लागत आहे.