बेळगावात ‘जीवनविद्या मिशन’च्या वतीने येत्या ९ ऑगस्ट रोजी ‘गुरुपौर्णिमा महोत्सव आणि कृतज्ञता दिन’ विशेष उत्साहात आयोजित करण्यात आला आहे, अशी माहिती प्रबोधक शंकरराव बांदेकर यांनी दिली.

आज बेळगावात आयोजित पत्रकार परिषदेत ते बोलत होते. बेळगाव येथील रेल्वे ओव्हरब्रिजजवळील मराठा मंदिर हॉलमध्ये रविवारी, ९ ऑगस्ट रोजी सकाळी ८:०० ते दुपारी १:३० या वेळेत ‘गुरुपौर्णिमा महोत्सव व कृतज्ञता दिन’ हा कार्यक्रम पार पडणार आहे. या सोहळ्यात मुख्य प्रबोधक म्हणून सद्गुरू श्री वामनराव पै यांचे सुपुत्र आणि युवा मार्गदर्शक श्री प्रल्हाद वामनराव पै सहभागी होणार आहेत. बेळगावात गेल्या ४० वर्षांपासून जीवनविद्या मिशन सामाजिक, शैक्षणिक आणि संस्कार मोहिमेच्या माध्यमातून कार्यरत असून, सद्गुरूंप्रती कृतज्ञता व्यक्त करण्यासाठी या महोत्सवाचे आयोजन करण्यात आल्याचे शंकरराव बांदेकर यांनी सांगितले.

यासोबतच, सोमवार १० ऑगस्ट रोजी बेळगावच्या मराठा मंडळ पॉलिटेक्निक कॉलेजच्या छत्रपती शिवाजी महाराज स्टेडियमवर २,००० हून अधिक विद्यार्थी आणि तरुणांसाठी विशेष प्रेरणादायी मार्गदर्शन कार्यक्रमाचे आयोजन करण्यात आले आहे. सद्गुरूंनी दिलेला ‘तूच आहेस तुझ्या जीवनाचा शिल्पकार’ आणि ‘जगातील सर्व लोक सुखी होवोत’ या तत्त्वज्ञानानुसार हे कार्यक्रम पार पडत असून, बेळगावच्या सर्व नागरिकांनी व तरुणांनी मोठ्या संख्येने उपस्थित राहून याचा लाभ घ्यावा, असे आवाहन त्यांनी केले.

या पत्रकार परिषदेला संस्थेचे अध्यक्ष शैलेश शिरोडकर, सचिव सतीश बेकवाडकर आणि खजिनदार दीपक बिरजे उपस्थित होते.