बेळगाव तालुक्यातील मुतगा गावात युवा सामाजिक कार्यकर्ते व उद्योजक शिवराज जाधव यांनी स्वतःच्या आर्थिक खर्चातून उभारलेल्या नूतन बस स्थानकाचे थाटात उद्घाटन करण्यात आले.

माजी आमदार संजय पाटील आणि शिवराज जाधव यांनी संयुक्तपणे फित कापून हे बस स्थानक प्रवाशांसाठी खुले केले. कॉलेजचे विद्यार्थी आणि ग्रामस्थांना, विशेषतः पावसाळ्याच्या दिवसांत हे बस स्थानक अत्यंत उपयुक्त ठरेल, असा विश्वास माजी आमदार संजय पाटील यांनी व्यक्त केला. गावातील उमेश पुरी, अप्पण्णा आणि राजीव यांच्या विनंतीला मान देऊन हे सार्वजनिक काम पूर्ण झाले आहे.

समाजासाठी उपयुक्त असणाऱ्या अशा कामांमध्ये सर्वांनी मोकळ्या मनाने सहभाग घेतला पाहिजे, असे आवाहन करत त्यांनी युवा उद्योजक शिवराज जाधव व त्यांच्या पाठीशी उभ्या राहणाऱ्या युवा कार्यकर्त्यांचे कौतुक केले, असे माजी आमदार संजय पाटील यांनी सांगितले.

या कार्यक्रमाला गावातील प्रमुख नागरिक उमेश पुरी, परशुराम केदार, सूरज पाटील, बाळू पाटील, दीपक पुरी, कुणाल पाटील आणि सागर पाटील यांच्यासह मोठ्या संख्येने ग्रामस्थ व युवक उपस्थित होते.