बेळगाव जिल्ह्यात मतदार यादी विशेष संक्षिप्त पुनरीक्षण मोहीम अत्यंत वेगाने सुरू असून, यासंदर्भात जिल्हाधिकारी मोहम्मद रोशन यांनी महत्त्वाची माहिती दिली आहे.

जिल्ह्यातील सर्व १८ मतदारसंघांमध्ये १०० टक्के अर्ज वाटपाचे काम पूर्ण झाले असून, यादीत आपले नाव आणि मतदान केंद्र बरोबर आहे की नाही, याची खात्री करणे ही मतदारांची जबाबदारी असल्याचे त्यांनी स्पष्ट केले. .

बेळगाव जिल्ह्यातील १८ मतदारसंघांमध्ये एकूण ४१.०७ लाख मतदार आहेत. आज दुपारी ३ वाजेपर्यंत १०० टक्के अर्ज वाटपाची प्रक्रिया यशस्वीरीत्या पूर्ण झाली आहे. अनुपस्थित, दुसऱ्या ठिकाणी स्थलांतरित झालेले, मृत आणि दुबार मतदारांचा अचूक शोध घेण्यासाठी बीएलओ कर्मचारी थेट घरोघरी जाऊन आवश्यक अर्ज आणि स्टिकर्स वाटप करत आहेत. जिल्ह्यात आतापर्यंत ७६ टक्के डिजिटायझेशन पूर्ण झाले असून, बेळगाव दक्षिण मतदारसंघात ६० टक्के आणि उत्तर मतदारसंघात ५१ टक्के काम पूर्ण झाले आहे. बीएलओ सुविधा केंद्रांवर प्राप्त होणारे अर्ज ऑनलाइन करण्याचे काम वेगाने सुरू असून, आवश्यक असल्यास आणखी एक आठवडा थांबून अंतिम यादी प्रसिद्ध केली जाईल, असे जिल्हाधिकाऱ्यांनी स्पष्ट केले.

निवासाचे ठिकाण बदललेले किंवा मतदान केंद्राची माहिती नसलेले मतदार आपल्या भागातील बीएलओशी तत्काळ संपर्क साधू शकतात. जे मतदार घरी उपलब्ध झाले नाहीत, त्यांच्या सोयीसाठी प्रत्येक मतदान केंद्र हे ‘बीएलओ सुविधा केंद्र’ म्हणून घोषित करण्यात आले आहे. नागरिक थेट तिथे जाऊन आपले पात्रता अर्ज जमा करू शकतात. मृत, स्थलांतरित आणि दुबार मतदारांची यादी राजकीय पक्षांचे प्रतिनिधीआणि नेत्यांसोबत सामायिक करण्यात आली आहे. मतदार यादीत कोणतीही त्रुटी असल्यास किंवा हयात असलेल्या व्यक्तीची नोंद चुकीने मृत म्हणून झाली असल्यास, ती दुरुस्त करण्यासाठी ८ ऑगस्टपर्यंत मुदत देण्यात आली आहे. नागरिकांनी आणि सर्व राजकीय पक्षांनी या पडताळणी प्रक्रियेत सक्रिय सहभाग घ्यावा, असे आवाहन जिल्हाधिकाऱ्यांनी केले आहे.