बेळगाव जिल्ह्यातील सवदत्ती तालुक्यातील नुग्गानट्टी गावात मालमत्तेची वाटणी आणि जमीन मोजणीच्या वादातून दुहेरी हत्याकांड घडले आहे. घरात घुसून लोखंडी रॉड आणि दगडाने केलेल्या हल्ल्यात दोन भावांचा मृत्यू झाला असून, याप्रकरणी सहा आरोपींना अटक करण्यात आल्याची माहिती जिल्हा पोलीस अधीक्षक के. रामराजन यांनी दिली आहे.

मुरगोड पोलीस ठाण्याच्या हद्दीतील नुग्गानट्टी गावात जमीन आणि मालमत्तेच्या वाटणीवरून सुरू असलेल्या दिवाणी वादातून हे हत्याकांड घडले. बसप्पा फकीरप्पा रामण्णावर आणि लक्कप्पा फकीरप्पा रामण्णावर अशी मृत भावांची नावे आहेत. जमिनीची मोजणी पूर्ण झाल्यानंतर अण्णव्वा आणि तिचा पती यल्लाप्पा यांच्यातील कौटुंबिक कलह आणि मालमत्तेतील हक्काच्या कारणावरून मध्यरात्री जोरदार वाद झाला. यावेळी आरोपींनी संघटित होऊन काठ्या, लोखंडी रॉड आणि दगड घेऊन घरात घुसून हल्ला केला. या गंभीर हल्ल्यात दोन्ही भावांचा जागीच मृत्यू झाला, तर फकीरप्पा नीलप्पा रामण्णावर यांच्यासह घरातील दोन मुले किरकोळ जखमी झाली आहेत.

या घटनेची गंभीर दखल घेत मुरगोड पोलिसांनी तातडीने कारवाई करत गुन्ह्यात सामील असलेल्या सहा मुख्य आरोपींना अटक केली आहे. जिल्हा पोलीस अधीक्षक के. रामराजन आणि डीएसपी यांनी स्वतः घटनास्थळाला भेट देऊन पाहणी केली असून तपासाला गती दिली आहे. या घटनेत इतर कोणाचा प्रत्यक्ष किंवा अप्रत्यक्ष सहभाग आहे का, यादृष्टीने पोलीस सर्व बाजूंनी तपास करत आहेत.

मालमत्तेच्या वादातून हे दुहेरी हत्याकांड घडले असून पोलिसांनी तातडीने कारवाई करत सहा आरोपींना अटक केली आहे. या प्रकरणाचा पुढील तपास मुरगोड पोलीस करत आहेत, असे जिल्हा पोलीस अधीक्षक के. रामराजन यांनी म्हटले.