बेळगाव शहरात दिवसेंदिवस पिण्याच्या पाण्याची समस्या गंभीर बनत चालल्याच्या पार्श्वभूमीवर, आमदार अभय पाटील यांच्या नेतृत्वाखाली लोकप्रतिनिधी आणि अधिकाऱ्यांच्या पथकाने शहराला पाणीपुरवठा करणाऱ्या मुख्य स्त्रोत असलेल्या राकसकोप धरणाला भेट देऊन पाणीपातळीची पाहणी केली.

शहरात पाणीटंचाईची झळ जाणवत असून आमदार अभय पाटील यांनी अधिकाऱ्यांसमवेत राकसकोप जलाशयाची प्रत्यक्ष पाहणी केली. या प्रसंगी बोलताना आमदार अभय पाटील यांनी, सध्याच्या कठीण परिस्थितीत नागरिकांना पाण्यासाठी त्रास होणार नाही याची काळजी घेण्याचे कडक निर्देश दिले. शहरातील बंद असलेले कूपनलिका तातडीने दुरुस्त करून ते सुरू करावेत, तसेच ज्या प्रभागांमध्ये पाण्याची तीव्र टंचाई आहे, तिथे महानगरपालिकेने तातडीने टँकरद्वारे पाणीपुरवठा करावा, अशा महत्त्वपूर्ण सूचना आणि मार्गदर्शक तत्त्वे त्यांनी प्रशासकीय अधिकाऱ्यांना दिली.

या दौऱ्यात त्यांच्यासोबत बेळगावच्या महापौर प्रीती कामकर, उपमहापौर हनुमंत कोंगाळी , विविध नगरसेवक, महानगरपालिका आणि जलमंडळाचे वरिष्ठ अधिकारी उपस्थित होते.