निपाणी तालुक्यातील मणकापूर येथील रहिवासी असलेल्या प्रशांत तायगोंड गायकवाड (३८) या पदवीधर तरुणाने हंचिनाळ (के.एस.) गावात गळफास घेऊन आत्महत्या केल्याची धक्कादायक घटना उघडकीस आली आहे.

मृत प्रशांत गायकवाड हे मूळचे हंचिनाळ गावचे रहिवासी होते, मात्र सध्या ते आपल्या कुटुंबासह मणकापूर येथे मामाच्या घरी राहत होते. डी.एड. पर्यंतचे शिक्षण पूर्ण केलेल्या प्रशांत यांनी एमपीएससी (MPSC) परीक्षाही दिली होती. सध्या ते इचलकरंजी येथील एका खाजगी शिक्षण संस्थेत शिक्षक म्हणून कार्यरत होते. प्रशांत आपल्या आईसोबत दुचाकीवरून मूळ गावी हंचिनाळ येथे काकांच्या घरी आले होते.

या दरम्यान, ते त्यांचे काका बाळासाहेब गायकवाड यांच्या गुरांच्या गोठ्यात गळफास घेतलेल्या अवस्थेत आढळून आले. घटनेची माहिती मिळताच निपाणी ग्रामीण पोलीस ठाण्याचे उपनिरीक्षक (पीएसआय) शिवराज नायकवाडी यांनी घटनास्थळाला भेट देऊन पाहणी केली. या प्रकरणाबाबत मृत प्रशांत यांचे बंधू प्रवीण गायकवाड यांनी पोलिसांत तक्रार दिली असून पोलीस पुढील तपास करत आहेत.