त्याग आणि सलोख्याचे प्रतीक असलेला बकरी ईद सण बेळगाव शहर व जिल्ह्यात अत्यंत श्रद्धेने आणि उत्साहात साजरा करण्यात आला. मुस्लिम बांधवांनी विविध ठिकाणी एकत्र येत सामूहिक नमाज पठण केले. या पवित्र सणाच्या निमित्ताने बेळगावमध्ये शांतता आणि सलोख्याचे वातावरण पाहायला मिळाले.

त्यागाचा सण म्हणून ओळखली जाणारी बकरी ईद बेळगाव शहर आणि जिल्ह्यात मुस्लिम बांधवांनी अत्यंत भक्तीभावाने साजरी केली. पैगंबर इब्राहिम यांच्या त्यागाचे स्मरण करण्यासाठी पाळल्या जाणाऱ्या या सणाच्या निमित्ताने मुस्लिम बांधवांनी सकाळी नवीन वस्त्रे परिधान करून विशेष प्रार्थना केली. प्रार्थनेनंतर एकमेकांना मिठी मारून ईदच्या शुभेच्छा देण्यात आल्या. सणाचा मुख्य भाग म्हणून कुर्बानी देण्यात आली. बेळगावमधील अंजुमन-ए-इस्लामच्या ईदगाह मैदानावर हजारो बांधवांनी एकत्र येत सामूहिक नमाज पठण केले.

हा सण त्याग आणि बलिदानाचे प्रतीक आहे. देवावर श्रद्धा ठेवणारी व्यक्ती या दिवशी आपल्यातील वाईट गुणांचा त्याग करून चांगल्या गोष्टींचा स्वीकार करते, असे मुस्लिम समाजातील प्रमुखांनी नमूद केले. केवळ बलिदान देणे हाच या सणाचा उद्देश नसून स्वच्छता आणि शिस्त राखणेही तितकेच महत्त्वाचे आहे. इतरांना त्रास होणार नाही अशा पद्धतीने हा सण साजरा करावा, असे आवाहन मुस्लिम समाजातील प्रमुखांनी केले.

बकरी ईदचा इतिहास सांगताना ज्येष्ठ नागरिकांनी सांगितले की, हा सण केवळ मेजवानीपुरता मर्यादित नसून तो त्यागाचे प्रतीक आहे. आपल्या आनंदामुळे इतरांना कोणताही त्रास होणार नाही याची काळजी घेतली पाहिजे आणि शांतता व सलोख्याने हा सण साजरा केला पाहिजे, असे मत ज्येष्ठ नागरिकांनी व्यक्त केले.

उत्तर मतदारसंघाचे आमदार आसिफ सेठ यांनी सर्व नागरिकांना बकरी ईदच्या शुभेच्छा दिल्या. आपला देश सर्व धर्मीयांच्या शांततेची बाग असून सर्वांनी शांतता आणि सलोख्याने हा सण साजरा करावा, असे आवाहन आमदार आसिफ सेठ यांनी केले.

बकरी ईदच्या पार्श्वभूमीवर बेळगावमध्ये कडक पोलीस बंदोबस्त तैनात करण्यात आला असून नागरिक अत्यंत उत्साहाने सण साजरा करत असल्याचे पोलीस आयुक्त भूषण बोरसे यांनी सांगितले. तसेच त्यांनी सर्व नागरिकांना बकरी ईदच्या शुभेच्छा दिल्या.

माजी आमदार फिरोज सेठ, युवक काँग्रेसचे नेते फैझान सेठ आणि अमन सेठ यांनीही मुस्लिम बांधवांची भेट घेऊन बकरी ईदच्या शुभेच्छा दिल्या.

सणाच्या पार्श्वभूमीवर बेळगाव शहरात कोणतीही अनुचित घटना घडू नये यासाठी प्रशासनाच्या वतीने आणि पोलीस विभागाकडून ठिकठिकाणी चोख पोलीस बंदोबस्त तैनात करण्यात आला होता.