बेळगाव जिल्हाधिकारी कार्यालयासमोर नव्याने बसवण्यात आलेल्या कन्नडमधील पहिल्या ‘हलमिडी शिलालेखाच्या’ प्रतिकृतीला वाटाळ नागराज यांच्या नेतृत्वाखाली जलाभिषेक करण्यात आला. या प्रसंगी बेळगावचे जिल्हाधिकारी मोहम्मद रोशन यांच्यासह विविध क्षेत्रातील मान्यवर उपस्थित होते. विविध ठिकाणांहून आणलेल्या कलशांमधील पाण्याने हा जलाभिषेक सोहळा पार पडला.

या वेळी बोलताना वाटाळ नागराज यांनी बेळगाव हा कर्नाटकचा अविभाज्य भाग म्हणून घोषित करण्यात यावा, अशी मागणी केली. २००५ मध्ये विजय मोरे महापौर असताना बेळगाव महानगरपालिकेत सीमाभागाबाबत एक ठराव मंजूर करण्यात आला होता, ज्याला कन्नड संघटनांकडून विरोध केला जात आहे.

सीमाविवाद सध्या सर्वोच्च न्यायालयात प्रलंबित असून तो लवकरात लवकर सुटावा, अशी अपेक्षा त्यांनी व्यक्त केली. तसेच सीमाप्रश्नी महाजन अहवाल हाच अंतिम मानला जावा, असे सांगत हा वाद मिटेपर्यंत आमचे आंदोलन सुरूच राहील, असा इशारा त्यांनी दिला. या प्रसंगी विविध कन्नड संघटनांचे पदाधिकारी, कार्यकर्ते आणि स्थानिक नागरिक उपस्थित होते.