हुबळीमध्ये काल झालेल्या वादळी मुसळधार पावसामुळे जनजीवन पूर्णपणे विस्कळीत झाले आहे. शहरात अनेक ठिकाणी मोठी झाडे कोलमडल्याने घरे आणि वाहनांचे मोठे नुकसान झाले असून नागरिकांना प्रचंड अडचणींचा सामना करावा लागत आहे.

जुने हुबळीमधील शिवपुत्र नगर येथील मेहबूब सुभानी दरगा तसेच परिसरातील घरे आणि वाहनांवर लिंबाचे एक मोठे झाड कोसळले. यामुळे मालमत्तेचे मोठे नुकसान झाले आहे.

पावसाच्या जोरामुळे हुबळीमधील सिद्धेश्वर पार्क येथील भारती कॉलनीमध्ये आणखी एक मोठे झाड विजेच्या खांबावर उन्मळून पडले. शहरात ठिकठिकाणी झाडे पडल्याने लाखो रुपयांचे नुकसान झाले असून, अनेक भागांतील वीजपुरवठा खंडित झाला आहे.