गोमातेला ‘राष्ट्रीय देवता’ म्हणून सन्मान मिळावा आणि २७ एप्रिल हा दिवस ‘गोमाता गौरव दिन’ म्हणून साजरा केला जावा, या उद्देशाने बेळगावमध्ये विशेष अभियान राबवण्यात येणार असल्याची माहिती मुक्ती मठाचे श्री शिवसिद्ध सोमेश्वर स्वामीजी यांनी दिली.

शुक्रवारी बेळगावमध्ये आयोजित पत्रकार परिषदेत बोलताना स्वामीजींनी सांगितले की, या अभियानांतर्गत बेळगावमधील आंबेडकर उद्यानापासून जिल्हाधिकारी कार्यालयापर्यंत भव्य रॅली काढण्यात येईल.

शेती आणि इतर क्षेत्रांत गोमय (शेण) व गोमूत्राचे महत्त्व वाढवण्यासाठी कृषी विद्यापीठांनी मोठ्या प्रमाणावर संशोधन करावे, असे प्रतिपादन श्री शिवसिद्ध सोमेश्वर स्वामीजी यांनी केले. सरकारने दूध, दही, तूप यांच्यासोबतच गोमय आणि गोमूत्राच्या वापराला प्रोत्साहन देणारी धोरणे आखावीत. तसेच या उत्पादनांवर आधारित प्रक्रिया उद्योगांना आणि संशोधनांना हक्काचे व्यासपीठ उपलब्ध करून द्यावे, अशी मागणी त्यांनी केली.

रासायनिक शेतीवर नियंत्रण मिळवून गो-आधारित शेतीला प्रोत्साहन द्यावे, असा सल्ला स्वामीजींनी दिला. सरकारी इमारती आणि रुग्णालयांमध्ये रंगाऐवजी गोमय रंगाचा आणि फिनाईलऐवजी ‘गोनील’चा वापर अनिवार्य करावा. आयुर्वेद रुग्णालयांतून पंचगव्य औषधांचे मोफत वाटप व्हावे आणि गो-आधारित उद्योग सुरू करणाऱ्या उद्योजकांना सरकारने विशेष सवलती द्याव्यात, अशी अपेक्षा श्री शिवसिद्ध सोमेश्वर स्वामीजी यांनी व्यक्त केली. कोणत्याही उद्योगाला जमीन देण्यापूर्वी त्या उद्योजकाकडून गोसेवेचे आश्वासन घ्यावे, असेही त्यांनी आवर्जून सांगितले.