पोटनिवडणुकीचे मतदान पूर्ण होताच विजापूरमध्ये आमदार बसनगौडा पाटील यत्नाळ यांनी स्वपक्षीय नेत्यांवर तोफ डागत राजकीय खळबळ उडवून दिली आहे. भाजपच्या रोड शोला गर्दी न जमल्याने प्रदेशाध्यक्ष बी. वाय. विजयेंद्र यांनी तिथून पळ काढला, अशा शब्दांत यत्नाळ यांनी त्यांची खिल्ली उडवली आहे.

विजापूरमध्ये पत्रकारांशी बोलताना यत्नाळ यांनी पोटनिवडणुकीच्या प्रचारातील गोंधळावर भाष्य केले. चार-चार मुख्यमंत्री प्रचाराला येऊनही पाच हजार लोक गोळा झाले नाहीत, मात्र आम्ही जिथे गेलो तिथे जनसागर उसळला होता. भाजपचा शेवटच्या दिवशीचा रोड शो केवळ गर्दीअभावी रद्द करावा लागला आणि विजयेंद्र यांना रिकाम्या हाताने परत जावे लागले, असे बसनगौडा पाटील यत्नाळ यांनी म्हटले.

निवडणुकीच्या शेवटच्या क्षणापर्यंत मुख्यमंत्री हतबल दिसले असून त्यांनी सात दिवस तळ ठोकूनही फारसा उपयोग झाला नसल्याचे यत्नाळ यांनी नमूद केले. काँग्रेसने लिंगायत समाजाला ५ हजार, तर दलित आणि अल्पसंख्याकांना १ ते ३ हजार रुपयांचे वाटप करून लोकशाहीची थट्टा केली आहे. हा सर्व प्रकार समानतेच्या तत्त्वाला हरताळ फासणारा असल्याची टीका बसनगौडा पाटील यत्नाळ यांनी केली.

भाजपमधील अंतर्गत वादावर बोलताना यत्नाळ म्हणाले की, संपूर्ण भाजप आम्हाला सोबत घेण्यास तयार आहे, मात्र काही हतबल नेते इतरांच्या आडून विधाने करत आहेत. हायकमांडलाही कर्नाटकातील ए आणि बी टीमच्या खेळाबाबत अद्याप पूर्ण कल्पना नसल्याची खंत त्यांनी व्यक्त केली. तसेच हुबळीतील लव्ह जिहाद प्रकरणामागे काँग्रेस नेत्यांचाच वरदहस्त असल्याचा खळबळजनक आरोप बसनगौडा पाटील यत्नाळ यांनी केला.

जयमृत्युंजय स्वामीजी यांच्या प्रकरणावर बोलताना या प्रकरणाची सखोल आणि निष्पक्ष चौकशी व्हावी, अशी मागणी त्यांनी केली. जे दोषी असतील त्यांना कठोर शिक्षा व्हायला हवी, अशी प्रतिक्रिया बसनगौडा पाटील यत्नाळ यांनी दिली.