कूडलसंगम पंचमसाली पीठाचे जयमृत्युंजय स्वामीजी यांच्यावर लैंगिक शोषणाचे आरोप करणारी महिला अचानक बेपत्ता झाल्याने खळबळ उडाली आहे. दरम्यान, या महिलेने ३ कोटींची खंडणी मागितल्याचा दावा करत विजापूरमध्ये तिच्यावर हनीट्रॅपचा गुन्हा दाखल करण्यात आला आहे.

जयमृत्युंजय स्वामीजी यांनी मठात अश्लील वर्तन केले आणि नग्न व्हिडिओ कॉल करण्यासाठी आपल्याला ब्लॅकमेल केले, असा आरोप एका महिलेने केला होता. या तक्रारीनंतर पोलीस अधिकृत जबाब नोंदवण्यासाठी संबंधित महिलेचा शोध घेत आहेत, मात्र ती महिला कोणाच्याही संपर्कात नाही. पोलिसांनी तिच्या बेंगळुरू येथील निवासस्थानी जाऊन तपास केला असता ती तिथे आढळली नाही. तसेच तिचा मोबाईल फोनही बंद असल्याने या प्रकरणातील गूढ वाढले आहे.

महिलेच्या आरोपानंतर विजापूर ग्रामीण पोलीस ठाण्यात स्वामीजींच्या वतीने प्रति तक्रार दाखल करण्यात आली आहे. संबंधित महिलेने अनाथालय चालवत असल्याचे सांगून स्वामीजींशी ओळख वाढवली आणि नंतर त्यांची बदनामी करण्याची धमकी देऊन ३ कोटी रुपयांची मागणी केली, असे संतोष मंजन्नी यांनी तक्रारीत म्हटले आहे. या तक्रारीवरून विजापूर पोलिसांनी संबंधित महिला आणि एका खाजगी वृत्तवाहिनीच्या व्यवस्थापकीय संचालकासह अन्य आरोपींविरुद्ध एफआयआर नोंदवला असून त्यांचा शोध सुरू केला आहे.

या प्रकरणात स्वामीजींचे काही खाजगी व्हिडिओ सोशल मीडियावर व्हायरल झाल्याने खळबळ उडाली आहे. “हे माझ्याविरुद्ध रचलेले एक पद्धतशीर कारस्थान असून हनीट्रॅपच्या माध्यमातून मला ब्लॅकमेल करण्याचा प्रयत्न केला जात आहे,” अशी प्रतिक्रिया जयमृत्युंजय स्वामीजी यांनी व्यक्त केली आहे. पोलीस सध्या या प्रकरणाचा सर्व बाजूंनी तपास करत असून बेपत्ता महिलेचा शोध घेत आहेत.