बेळगाव मधील जैन इंजिनीअरिंग कॉलेजमध्ये सांस्कृतिक कार्यक्रमांचा मोठा उत्साह पाहायला मिळाला. जिल्हाधिकारी मोहम्मद रोशन यांच्या प्रमुख उपस्थितीत पार पडलेल्या या सोहळ्याने विद्यार्थ्यांमध्ये आपल्या संस्कृती आणि भाषेबद्दलचा अभिमान जागृत केला.

२६ मार्च रोजी जैन इंजिनीअरिंग कॉलेजच्या कन्नड संघाच्यावतीने या सांस्कृतिक कार्यक्रमांचे आयोजन करण्यात आले होते. कार्यक्रमाची सुरुवात देवी भुवनेश्वरीच्या पूजनाने झाली, त्यानंतर पारंपरिक वाद्यांच्या गजरात भव्य मिरवणूक काढण्यात आली. या मिरवणुकीने संपूर्ण परिसराचे लक्ष वेधून घेतले.

कार्यक्रमाचे उद्घाटन करताना जिल्हाधिकारी मोहम्मद रोशन यांनी मातृभाषेचे महत्त्व अधोरेखित केले. ते म्हणाले की, “कर्नाटकात राहणाऱ्या प्रत्येकाने कन्नड भाषा शिकणे गरजेचे आहे. बेळगावमधील ९९.९% समस्या या केवळ परस्पर विश्वास आणि संवादामुळे सुटू शकतात.”

या सोहळ्याला जे.सी.ई. व्यवस्थापन समितीचे सदस्य प्रा. उदय चंद्र, मुख्य अतिथी श्रीमती भारती बसवराज माडबावी, प्राचार्य डॉ. जे. शिवकुमार, समन्वयक डॉ. संजीव संगमी, निमंत्रक डॉ. रोहित राज आणि विद्यार्थी अध्यक्ष कुशाल घोडगेरी उपस्थित होते. समारंभाच्या शेवटी विद्यार्थ्यांनी सादर केलेल्या विविध सांस्कृतिक कार्यक्रमांनी उपस्थितांची मने जिंकली.