धारवाड जिल्हा प्रशासन, जिल्हा पंचायत आणि कामगार विभागातर्फे आयोजित वेठबिगारी निर्मूलन कार्यशाळेचे उद्घाटन जिल्हाधिकारी स्नेहल आर. यांच्या हस्ते करण्यात आले. यावेळी त्यांनी वेठबिगारी ही मानवतेच्या विरोधातील प्रथा असून, ती समूळ नष्ट करण्यासाठी सर्व विभागांनी समन्वय राखून काम करण्याचे आवाहन केले.

वेठबिगारी ही गुलामगिरीचे प्रतीक असून ती पूर्णपणे नष्ट केल्याशिवाय समाजात समानता येणार नाही. ही प्रथा रोखण्यासाठी सरकारने अनेक कायदे केले आहेत, मात्र त्यांची प्रभावी अंमलबजावणी अधिकाऱ्यांच्या इच्छाशक्तीवर अवलंबून असते, असे प्रतिपादन जिल्हाधिकारी स्नेहल आर. यांनी केले. अधिकाऱ्यांनी वेठबिगारीमुक्त समाजाचा संकल्प करून आपले कर्तव्य पार पाडावे, तरच कायद्याला खऱ्या अर्थाने अर्थ प्राप्त होईल, अशी भावना त्यांनी व्यक्त केली.

कर्नाटकात वेठबिगारी प्रतिबंधक कायदा लागू होऊन ५० वर्षे पूर्ण झाली असली, तरी अद्याप काही ठिकाणी ही पद्धत दिसून येते, ही बाब अत्यंत चिंताजनक असल्याचे जिल्हाधिकाऱ्यांनी नमूद केले. ही अनिष्ट प्रथा कायमची बंद करण्यासाठी सर्वांनी एकजुटीने काम करण्याची गरज त्यांनी अधोरेखित केली.

वेठबिगारी आणि बालकामगार प्रथेचे गांभीर्य लक्षात घेऊन प्रत्येकाने जागरूक राहिले पाहिजे. सुटीच्या दिवसातही मुलांना कामावर पाठवू नका, असे आवाहन करत मुलांच्या शिक्षणावर आणि भविष्यावर लक्ष देण्याची गरज जिल्हाधिकाऱ्यांनी व्यक्त केली. समाजात शांतता आणि समानता टिकवण्यासाठी जनसामान्यांचे सहकार्य महत्त्वाचे असल्याचेही त्यांनी स्पष्ट केले.

जर मुले शाळा सोडून कामावर जात असल्याचे आढळल्यास, संबंधित जबाबदार व्यक्तींवर कायदेशीर कारवाई करण्यात यावी. मुलांना आणि त्यांच्या पालकांना शिक्षणाचे महत्त्व पटवून देऊन, अशा मुलांना पुन्हा शाळेच्या प्रवाहात आणण्यासाठी विशेष मोहीम राबवावी, अशा सूचना जिल्हाधिकारी स्नेहल आर. यांनी अधिकाऱ्यांना दिल्या.