महिला व बालविकास मंत्री लक्ष्मी हेब्बाळकर आपला वाढदिवस यंदा अत्यंत आगळ्यावेगळ्या आणि सामाजिक बांधिलकी जपत साजरा करणार आहेत.

मंत्री लक्ष्मी हेब्बाळकर यांच्या वाढदिवसानिमित्त शनिवारी बेळगावमधील बेणकनहळ्ळी येथील गार्डन कोर्ट मैदानावर एका भव्य कार्यक्रमाचे आयोजन करण्यात आले आहे. या सोहळ्याची माहिती देताना विधान परिषद सदस्य चन्नराज हट्टीहोळी यांनी सांगितले की, १४ फेब्रुवारी रोजी होणाऱ्या या भव्य कार्यक्रमात मतदारसंघातील सुमारे १५ हजारांहून अधिक ज्येष्ठ नागरिक सहभागी होतील. ज्येष्ठ नागरिकांच्या चेहऱ्यावर हसू फुलवणे हाच मंत्र्यांचा मुख्य उद्देश असून, दुपारी २ वाजेपासून विविध सांस्कृतिक कार्यक्रमांनी या सोहळ्याला सुरुवात होईल, असे चन्नराज हट्टीहोळी यांनी स्पष्ट केले.

ज्येष्ठ नागरिकांमध्ये जीवनाचा उत्साह वाढवण्यासाठी म्युझिकल चेअर, लिंबू-चमचा यांसारख्या १० हून अधिक मनोरंजक खेळांचे आयोजन करण्यात आले असून विजेत्यांचा गौरवही केला जाणार आहे. संपूर्ण मतदारसंघ हे एक कुटुंब असून जात-धर्माचा भेदभाव न करता ज्येष्ठांचे आशीर्वाद घेणे हा आमचा मुख्य हेतू असल्याचे चन्नराज हट्टीहोळी यांनी सांगितले. दिलेला शब्द पाळणारी माता अशा शब्दांत मतदारसंघातील जनता मंत्र्यांचा गौरव करत असून, हे त्यांच्या लोकहितवादी कामांचेच फलित असल्याची प्रतिक्रिया चन्नराज हट्टीहोळी यांनी व्यक्त केली.