महाशिवरात्रीनिमित्त चिक्कोडी तालुक्यातील एकसंबा येथील कर्लहोंडलिंगेश्वर यात्रा महोत्सव १६ ते १८ फेब्रुवारी दरम्यान आयोजित करण्यात आला असल्याची माहिती यात्रा कमिटीच्या सदस्यांनी दिली आहे. दरवर्षीप्रमाणे यंदाही या उत्सवासाठी जय्यत तयारी करण्यात आली आहे.

सोमवार, १६ फेब्रुवारी रोजी सकाळी ८ वाजता कुंभमेळा आणि पारंपरिक वाद्यांच्या गजरात पालखीचे आगमन होईल, त्यानंतर ग्राम नैवेद्य अर्पण केला जाईल. मंगळवार, १७ फेब्रुवारी रोजी सकाळी ८ वाजता रुद्राभिषेक आणि दुपारी १२ वाजता महाप्रसादाचे आयोजन करण्यात आले आहे.

यात्रेच्या निमित्ताने मंगळवारी सकाळी १० वाजल्यापासून सांस्कृतिक कार्यक्रमांची रेलचेल असेल. यामध्ये विजापूर जिल्ह्यातील बागेवाडी आणि रायबाग तालुक्यातील खणदाळ येथील कलाकारांचे ‘गी-गी’ पद आणि शाहिरी गायनाचे कार्यक्रम होतील. यामध्ये विद्याश्री मसबीनाळ आणि लक्ष्मण खणदाळ आपली कला सादर करतील. बुधवार, १८ फेब्रुवारी रोजी सकाळी ९ वाजल्यापासून घोडागाडी शर्यत आणि त्यानंतर बैल घेऊन धावण्याच्या शर्यतींचे आयोजन करण्यात आले आहे. या सर्व कार्यक्रमांचा भाविकांनी लाभ घ्यावा, अशी विनंती कमिटीने केली आहे.

या पत्रकार परिषदेला यात्रा कमिटीचे अध्यक्ष आशिष हुक्केरी, सतीश कबाडे, सुरेंद्र कबाडे, रवी हिटणे, पुंडलिक सात्वर, सचिन माने, सुधाकर मोपगार, पुंडलिक हिटणे, राजू सलगर, बाबू बाकळे, बालचंद्र सप्तसागर आणि रमेश कम्मर यांच्यासह इतर मान्यवर उपस्थित होते.