विजापूरमध्ये प्रेमासाठी मुलीने चक्क आपल्या पालकांनाच नाकारलं आहे. प्रियकरासोबत लग्न केल्यानंतर मुलीने घरी जाण्यास नकार दिल्याने पोलीस ठाण्याबाहेर आई-वडिलांनी मोठा टाहो फोडला. याच प्रेम प्रकरणाचा हा विशेष रिपोर्ट.

विजापूरच्या गांधी चौक पोलीस ठाण्यासमोर मध्यरात्रीपर्यंत आपल्या लेकीसाठी रडणाऱ्या पालकांचे दृश्य हृदय पिळवटून टाकणारे होते. “मुली, चल आपल्या घरी” अशी आर्त साद घालणाऱ्या आईच्या हाकेला मुलीने मात्र मौनानेच उत्तर दिले. ४ फेब्रुवारी रोजी शानुबाई चव्हाण आणि पंडित चव्हाण यांची मुलगी निशा घरातून बेपत्ता झाली होती. मुलीचा शोध न लागल्याने घाबरलेल्या पालकांनी स्थानिक पोलीस ठाण्यात ती बेपत्ता असल्याची तक्रार नोंदवली होती.

या प्रकरणाला तेव्हा कलाटणी मिळाली जेव्हा निशा स्वतःहून आपल्या प्रियकरासह, मोहम्मद सलीम सुतार याच्यासोबत महिला पोलीस ठाण्यात हजर झाली. आम्ही दोघांनी एकमेकांच्या संमतीने लग्न केले असून मी माझ्या इच्छेने हा निर्णय घेतला आहे, असे निशाने पोलिसांना ठामपणे सांगितले. आता पालकांसोबत परतणे शक्य नसून पती सलीमसोबतच पुढील आयुष्य जगणार असल्याचे तिने स्पष्ट केले.

मुलगी पोलीस ठाण्यात असल्याची बातमी समजताच पालकांनी तिथे धाव घेतली. आई शानुबाई यांनी ठाण्याबाहेर बसून प्रचंड आक्रोश केला, पण निशा आपल्या निर्णयावर ठाम राहिली. अखेर निशा सज्ञान असल्याने कायद्यानुसार पोलिसांनी तिला पती सलीमसोबत जाण्याची परवानगी दिली. पोलीस वाहनातून मुलगी निघून जाताना पालकांचा बांध फुटला. प्रेमाचा विजय झाला असला तरी, जन्मदात्यांचा पराभव झाल्याची भावना तिथे उपस्थित असलेल्यांच्या डोळ्यांतून वाहत होती.

एकूणच, या प्रेमविवाहामुळे विजापूरमध्ये मोठी चर्चा रंगली आहे. प्रेमाची ही वाट मुलीसाठी सुखाची ठरली असली, तरी पालकांच्या पदरी मात्र आयुष्यभराचे दुःख आले आहे, हेच या घटनेतून अधोरेखित होत आहे.