चिकोडी तालुक्यातील मुगळी गावामध्ये कचरा विल्हेवाट लावणारे वाहन उलटून झालेल्या भीषण अपघातात तीन महिला कर्मचारी गंभीर जखमी झाल्या आहेत. ही घटना आज दुपारी घडली असून या अपघातामुळे परिसरात खळबळ उडाली आहे.

आज दुपारच्या सुमारास कचरा घेऊन जात असताना चालकाचे वाहनावरील नियंत्रण सुटले आणि गाडी पलटी झाली. या अपघातात उज्ज्वला जगन्नाथ मादिगा, वैशाली राजू कवळिकट्टी आणि अश्विनी बसवराज कांबळे या तीन महिला जखमी झाल्या असल्याची माहिती मिळाली आहे.

अपघातानंतर स्थानिक नागरिकांनी तातडीने मदतीसाठी धाव घेतली. सर्व जखमींना तातडीने उपचारासाठी चिकोडी येथील खासगी रुग्णालयात दाखल करण्यात आले आहे. या घटनेची नोंद चिकोडी पोलीस ठाण्यात झाली असून पोलीस पुढील तपास करत आहेत.