अक्कलकोट येथील श्री अक्कलकोट अन्नदान मंडळाच्या वतीने आयोजित करण्यात आलेली श्री स्वामी समर्थांची २९ वी पादुका पालखी परिक्रमा सोमवारी संध्याकाळी बेळगावमध्ये दाखल झाली.

गोवा वेस येथील दत्त मंदिरात अत्यंत भक्तिमय वातावरणात या पालखीचे स्वागत करण्यात आले. श्री अक्कलकोट अन्नदान मंडळाचे संस्थापक अध्यक्ष जन्मेजयराजे विजयसिंहराजे भोसले आणि कार्याध्यक्ष अमोलराजे भोसले यांच्या मार्गदर्शनाखाली ही यात्रा सुरू आहे. परंपरेनुसार, सर्वप्रथम दत्त मंदिरात पादुकांचे विशेष पूजन आणि आरती करण्यात आली. त्यानंतर ढोल-ताशांच्या गजरात आणि भजनी मंडळांच्या सहभागासह मिरवणुकीला सुरुवात झाली. ही मिरवणूक गोवा वेस, बसवेश्वर वृत्त आणि कोरे गल्लीमार्गे शहापूरमधील हट्टीहोळ गल्लीत पोहोचली.

मिरवणुकीच्या मार्गावर हजारो भक्तांनी पादुकांचे दर्शन घेण्यासाठी गर्दी केली होती, तर महिलांनी जागोजागी पालखीला ओवाळून भक्ती प्रकट केली. यावेळी मंडळाचे उपाध्यक्ष अभय खोबरे आणि प्रमुख पदाधिकारी नेममिनाथ गरगट्टे, प्रभाकर नाकाडी यांच्यासह शेकडो भक्त उपस्थित होते.

मंगळवारी ही पालखी महाद्वार रोडवरील आराधना केंद्रात जाणार असून, तिथेच पालखीचा मुक्काम असेल.