मकर संक्रांतीच्या पवित्र मुहूर्तावर चिक्कोडी तालुक्यातील कल्लोळ येथील कृष्णा नदीच्या पात्रात श्रीशैल जगद्गुरु डॉ. चन्नसिद्धराम पंडिताराध्य शिवाचार्य महास्वामीजींनी हजारो भाविकांच्या उपस्थितीत पुण्यस्नान केले. सूर्य धनू राशीतून मकर राशीत प्रवेश करत असतानाच्या या मंगल समयी परंपरेनुसार हे ‘मकर स्नान’ पार पडले.

यावेळी श्रीशैल जगद्गुरुंसोबत सिद्धलिंग पाठशाळेचे विद्यार्थी आणि मोठ्या संख्येने उपस्थित असलेल्या भाविकांनी अत्यंत श्रद्धापूर्वक कृष्णा नदीत स्नान केले. या सोहळ्यापूर्वी कल्लोळ गावात जगद्गुरुंच्या हस्ते सामूहिक इष्टलिंग पूजा पार पडली. या भव्य पूजेचे दर्शन घेण्यासाठी परिसरातील हजारो भाविकांनी गर्दी केली होती.

वीरभद्रेश्वर-काडसिद्धेश्वर मठाच्या वतीने आयोजित या धार्मिक कार्यक्रमामुळे संपूर्ण कल्लोळ परिसर भक्तीमय झाला होता.