बी. ए. सनदी सांस्कृतिक प्रतिष्ठानच्या वतीने कर्नाटक राज्योत्सव आणि राज्यस्तरीय ‘जन्ना सनदी’ साहित्य पुरस्कार वितरण सोहळा उत्साहात पार पडला. बेळगाव येथील कन्नड साहित्य भवनात आयोजित या कार्यक्रमात विविध क्षेत्रांतील मान्यवरांनी उपस्थिती लावली होती.

साहित्यिक डॉ. रामकृष्ण मराठे यांच्या अध्यक्षतेखाली झालेल्या या कार्यक्रमात प्रा. डॉ. बसवराज जगजंपी मुख्य अतिथी म्हणून उपस्थित होते. यावेळी बोलताना जगजंपी यांनी तुरमुरी, इंचल आणि सनदी यांसारख्या साहित्यिकांनी कन्नड साहित्यासाठी दिलेले योगदान अमूल्य असल्याचे सांगितले. बी. ए. सनदी हे एक आदर्श साहित्यिक होते आणि त्यांचे प्रतिष्ठान बेळगावात सक्रियपणे कार्य करत आहे, असे त्यांनी नमूद केले.

या सोहळ्यात ज्येष्ठ रंगकर्मी शिरीष जोशी यांना ‘कन्नड गडी टिळक’ पुरस्काराने सन्मानित करण्यात आले. तसेच उदयोन्मुख कवी शशी तरीकेरे यांना ‘जन्ना सनदी’ राज्यस्तरीय साहित्य पुरस्कार देऊन गौरविण्यात आले.

या कार्यक्रमाच्या यशस्वीतेसाठी बसवराज गार्ती, ए. ए. सनदी, सी. एम. बुदिहाळ आणि प्रा. बी. एफ. कल्लण्णावर यांच्यासह इतर सदस्यांनी परिश्रम घेतले.