बेळगावात ‘उर्दू भवन’ निर्माण करावे, या मागणीसाठी उर्दू भाषकांनी बेळगावमधील सुवर्णसौधसमोर आंदोलन केले.

आज बेळगावच्या सुवर्णसौधसमोर बेळगावात उर्दू घर भवन बांधण्याच्या मागणीसाठी हे आंदोलन करण्यात आले. नगरसेवक शाहिद खान पठाण म्हणाले की, गेल्या अनेक वर्षांपासून उर्दू भाषेकडे दुर्लक्ष केले जात आहे. बेळगाव शहरात उर्दू भाषिक मोठ्या संख्येने आहेत. मात्र, उर्दू भवन नसल्यामुळे भाड्याच्या इमारतीत ग्रंथालय आणि संगणक प्रशिक्षण केंद्र चालवावे लागत आहे. सरकारने उर्दू भवन बांधावे, अशी त्यांची मागणी आहे. ‘आमची मागणी पूर्ण न झाल्यास, आम्ही येत्या काळात मोठे आंदोलन करू,’ असा इशाराही त्यांनी दिला.

गेल्या २० वर्षांपासून उर्दू घर भवन बांधण्याची सातत्याने मागणी केली जात आहे. बेळगावात मोठ्या संख्येने उर्दू भाषिक आहेत. या उर्दू भवनात ग्रंथालय तयार करावे, अशी मागणी त्यांनी केली. शरीफ अहमद शरीफ, शरफुद्दीन मोकाशी यांच्यासह इतरांनी आग्रह धरला की, ‘उर्दू भाषकांनी देशाच्या स्वातंत्र्यासाठी योगदान दिले आहे, तरीही ७५ वर्षे होऊनही उर्दू भाषकांना न्याय मिळालेला नाही. बेळगावात उर्दू भाषिक जास्त असल्याने येथे उर्दू भवन बांधावे आणि ते कर्नाटक उर्दू अकादमीच्या नेतृत्वाखाली कार्यरत असावे.’

यानंतर यासंबंधीचे निवेदन संबंधित मंत्र्यांना सादर करण्यात आले.