भारतीय संविधानाचे शिल्पकार डॉ. बी.आर. आंबेडकर यांच्या ६९ व्या महापरिनिर्वाण दिनानिमित्त बेळगावमध्ये बाबासाहेबांच्या प्रतिमेला पुष्पहार अर्पण करून अभिवादन करण्यात आले.

आज डॉ. आंबेडकर उद्यानात महापौर मंगेश पवार, उपमहापौर वाणी जोशी, समाज कल्याण विभागाचे अधिकारी रामनगौडा कन्नोळी यांच्यासह इतरांनी बेळगावमध्ये बाबासाहेबांच्या प्रतिमेला पुष्पहार अर्पण करून अभिवादन केले.

यावेळी बोलताना महापौर मंगेश पवार म्हणाले की, आज संविधान शिल्पकार डॉ. बाबासाहेब आंबेडकर यांचा ६९ वा महापरिनिर्वाण दिन आहे. त्यांनी जगाने दखल घ्यावी, असे योगदान देशाला दिले आहे. आपण त्यांच्या तत्त्व आणि आदर्शांचे पालन करून देशासाठी योगदान दिले पाहिजे. त्यांच्यासारखे योगदान देता आले नाही, तरी निदान त्यांच्या तत्त्व आणि आदर्शांचे पालन तरी केले पाहिजे, असे आवाहन त्यांनी केले.

उपमहापौर वाणी जोशी म्हणाल्या की, विश्वतुल्य संविधानाचे शिल्पकार डॉ. बाबासाहेब यांनी भारताला जगासाठी आदर्श ठरेल असे संविधान दिले आहे. त्यांनी दाखवलेल्या मार्गावर आपण सर्वांनी चालले पाहिजे.

यावेळी महालिंगप्पा कोलकार यांनी आवाहन केले की, विश्वरत्न डॉ. बाबासाहेब आंबेडकर यांच्या तत्त्व आणि आदर्शांची माहिती घेऊन त्यांच्या मार्गावर चालले पाहिजे. प्रत्येकाने उद्योजक बनावे. सर्व भाषा आणि सर्व विद्या आत्मसात करून सुशिक्षित होऊन समाजाच्या मुख्य प्रवाहात आल्यास, त्यांना खरी श्रद्धांजली अर्पण होईल. याप्रसंगी बसवराज चन्नवर, मल्लेश चौगले, बसवराज रायगोळ, मल्लेश कुरंगी, यल्लप्पा गडिनायक यांच्यासह अनेक जण उपस्थित होते.

यानंतर, बेळगाव येथील सदासिवनगरमधील बुद्ध विहाराला भेट देऊन महापौर मंगेश पवार, उपमहापौर वाणी जोशी, जिल्हाधिकारी मोहम्मद रोशन, जिल्हा परिषदेचे मुख्य कार्यकारी अधिकारी राहुल शिंदे, शहर पोलीस आयुक्त भूषण बोरसे, समाज कल्याण विभागाचे अधिकारी रामनगौडा कन्नोळी यांच्यासह इतरांनी भगवान बुद्ध यांच्या प्रतिमेला पुष्प अर्पण केले. त्यानंतर त्यांनी आंबेडकर भवनासमोर असलेल्या बाबासाहेबांच्या प्रतिमेला पुष्पहार अर्पण करून मानवंदना दिली.