बेळगाव तालुक्यातील हिरेबागेवाडी पोलीस ठाण्याच्या पोलिसांनी जलद कारवाई करत, सार्वजनिक ठिकाणी जुगार खेळणाऱ्या पाच आरोपींना अटक केली आहे. त्यांच्याकडून रोख रक्कम आणि जुगाराचे साहित्य जप्त करण्यात आले आहे.

दिनांक २१ नोव्हेंबर २०२५ रोजी, हिरेबागेवाडी पोलीस ठाण्याचे पोलीस उपनिरीक्षक बी. के. मिटगार आणि त्यांच्या कर्मचाऱ्यांनी मिळालेल्या गोपनीय माहितीच्या आधारे हलगा गावातील विजयनगर तलावाजवळच्या सार्वजनिक स्थळावर छापा टाकला. यावेळी सचिन अनगोळकर, प्रणय गोरल, किशोर सुतार, प्रथमेश यादव आणि विश्वनाथ गोटडके या पाच आरोपींना जुगार खेळताना रंगेहाथ पकडले.

या धाडीदरम्यान, आरोपींकडून एकूण ५,००० रुपये रोख रक्कम आणि इतर साहित्य जप्त करण्यात आले आहे. याप्रकरणी हिरेबागेवाडी पोलीस ठाण्यात गुन्हा दाखल करण्यात आला आहे. पोलिसांनी अटक केलेल्या आरोपींवर कायदेशीर प्रक्रिया सुरू केली असून, प्रकरणाचा पुढील तपास सुरू आहे.

यशस्वीरित्या धाड टाकून पाच आरोपींना ताब्यात घेणाऱ्या पीएसआय आणि त्यांच्या कर्मचाऱ्यांच्या कार्याची बेळगाव शहर पोलीस आयुक्त आणि डीसीपी यांनी प्रशंसा केली आहे.