तरुण हे आपल्या देशाची राष्ट्रीय संपत्ती आहेत. पालकांचे सहकार्य आणि शिक्षकांचे मार्गदर्शन घेऊन विद्यार्थ्यांनी आपली कौशल्ये वाढवावीत आणि यशाचे शिखर गाठावे असे आवाहन रामके ग्रुपचे अध्यक्ष अल्ला अयोध्या रमिरेड्डी यांनी केले.

कर्नाटक लॉ सोसायटीच्या गोगटे इन्स्टिट्यूट ऑफ टेक्नॉलॉजीचा ९ वा पदवी दिन अत्यंत उत्साहात आयोजित करण्यात आला होता. या समारंभासाठी बंगळूरू येथील भारतीय विज्ञान संस्थेचे संचालक प्रो. गोविंदन् रंगराजन, रामके ग्रुपचे अध्यक्ष अल्ला अयोध्या रमिरेड्डी आणि कर्नाटक लॉ सोसायटीचे अध्यक्ष प्रदीप सावकार प्रमुख अतिथी म्हणून उपस्थित होते. सर्वप्रथम, अत्यंत शिस्तबद्ध पथसंचलनातून मान्यवरांना व्यासपीठावर आणण्यात आले.

मान्यवरांच्या हस्ते समारंभाचे उद्घाटन करण्यात आले व त्यांचा सत्कार करण्यात आला. यावेळी बोलताना रामके ग्रुपचे अध्यक्ष अल्ला अयोध्या रमिरेड्डी म्हणाले, तरुण हे आपल्या राष्ट्राची राष्ट्रीय संपत्ती आहेत. बेळगावच्या या महाविद्यालयात ५० टक्क्यांहून अधिक तरुणींनी यश मिळवले आहे, हे कौतुकास्पद आहे. २०२७ पर्यंत भारत जगातील उत्तम आर्थिक राष्ट्र म्हणून उदयास येईल. पालकांच्या सहकार्याने आणि शिक्षकांच्या मार्गदर्शनाने विद्यार्थ्यांनी आपली कौशल्ये वाढवून कोणत्याही क्षेत्रात जगात यश मिळवावे, असे त्यांनी म्हटले.

भारतीय विज्ञान संस्थेचे संचालक प्रो. गोविंदन् रंगराजन यांनी काळानुसार बदल होणे सामान्य असल्याचे सांगितले. “सध्या चॅट जीपीटी आणि एआय तंत्रज्ञान वापरात आहेत. परंतु, वास्तुविशारदांनी या तंत्रज्ञानाचा सदुपयोग करून काय निर्माण करायचे, हे समजून घेतले पाहिजे. पूर्णपणे आधुनिक तंत्रज्ञानावर अवलंबून न राहता वैज्ञानिक कौशल्ये विकसित करावीत,” असा सल्ला त्यांनी दिला.

कर्नाटक लॉ सोसायटीचे अध्यक्ष प्रदीप सावकार म्हणाले की, पदवी शिक्षण केवळ प्रमाणपत्रापुरते मर्यादित न राहता यश आणि सिद्धी अत्यंत महत्त्वाच्या आहेत. मानवाच्या यशासाठी उच्च शिक्षण पूरक आहे. वेळेचा योग्य वापर आणि योग्य व्यक्तींचे मार्गदर्शन हेच त्यांच्या उत्तम भविष्याची नांदी आहे, असे मत त्यांनी व्यक्त केले.

यावेळी के. एल. एस. चेअरमन ए. के. तगारे यांनी विद्यार्थ्यांना नवीन कौशल्ये शिकून आपले व्यावसायिक जीवन निवडावे आणि यश मिळवावे, असे आवाहन केले.

कार्यक्रमाच्या यशस्वितेसाठी आर. बी. भंडारे, डी. व्ही. कुलकर्णी, व्ही. एम. देशपांडे, एस. व्ही. गणाचारी, आर. के. बेळगाँवकर यांच्यासह इतरांनी परिश्रम घेतले.