पतंगाचा मांजाचा दोरा केवळ माणसांसाठीच नाही, तर प्राणी-पक्ष्यांसाठीही जीवघेणा ठरत आहे. मांजाच्या दोऱ्यात अडकल्यामुळे एका घुबडाला उडता न आल्याने ते तडफडत होते. ही घटना बेळगावमधील जाधव नगर येथे घडली असून, स्थानिक तरुणांनी या घुबडाचे प्राण वाचवून आपले पक्षीप्रेम सिद्ध केले आहे.

बेळगावमध्ये मांजाच्या दोऱ्याच्या घटना अलीकडे वाढत आहेत. पादचाऱ्यांच्या गळ्यात मांजा अडकल्याच्या अनेक घटना समोर आल्या आहेत. काल बेळगावमधील जाधव नगर येथे पतंगाचा मांजा एका घुबडाच्या पायात अडकल्याने ते उडता न आल्याने तडफडत होते. हे पाहताच कुमारस्वामी बसवणकोप्पा आणि मकबुलसाब मीटेखान यांच्यासह इतर तरुणांनी धाव घेऊन घुबडाला मांजाच्या फासातून मुक्त केले. त्याला प्राथमिक उपचार देऊन त्यांनी तातडीने वन विभागाकडे धाव घेतली आणि सहायक वन संरक्षक अधिकारी विनय गौडर यांच्याकडे सुपूर्द केले. वन अधिकाऱ्यांनीही तत्काळ जखमी घुबडावर उपचार सुरू केले. जाधव नगरच्या या तरुणांच्या कार्याची नागरिकांनी प्रशंसा केली.

बेळगाव शहरात अलीकडे मांजाच्या दोऱ्यामुळे होणारे अपघात वाढत असून, यावर नियंत्रण ठेवण्यासाठी उपाययोजना करण्याची मागणी नागरिकांकडून जोर धरत आहे.