ऊस पिकांमध्ये लपवून लावलेला, लाखो रुपये किमतीचा १५ किलो १०० ग्रॅम ओला गांजा जप्त करण्यात आला आहे. या प्रकरणी तिखोटा तालुक्यातील कोट्याळ गावातून एका आरोपीला अटक करण्यात आली आहे.

कोट्याळ गावातील चंद्रशेखर शिवप्पा पाटील या आरोपीला अटक करून, त्याच्याकडून अंदाजे ६ लाख ४० हजार रुपये किमतीची गांजाची झाडे जप्त करण्यात आली आहेत.

आरोपीने आपल्या शेतात उसाच्या पिकांमध्ये ओल्या गांजाची झाडे लावली होती. याबद्दल मिळालेल्या गुप्त माहितीनुसार, बेळगाव विभागाचे उत्पादन शुल्क उपायुक्त आणि संयुक्त उपआयुक्तांच्या मार्गदर्शनाखाली तसेच विजापूरचे उत्पादन शुल्क उपअधीक्षक यांच्या नेतृत्वाखाली उत्पादन शुल्क निरीक्षक महादेव पुजारी यांच्या पथकाने छापा टाकून गांजाची झाडे शोधून काढली. आरोपीविरुद्ध एनडीपीएस कायद्यांतर्गत गुन्हा दाखल करण्यात आला असून, पुढील तपास सुरू आहे. या कारवाईत उत्पादन शुल्क विभागाचे माळप्पा पुजारी, प्रकाश कुंभार, अनिल कुंभार, यल्लप्पा भजंत्री, तसेच होमगार्ड दलाचे शिवबसू, सिद्दू यांच्यासह इतर कर्मचारी सहभागी झाले होते.