बेळगाव येथे कार्यरत असलेल्या केएलई संस्थेचा ११० वा स्थापना दिवस नुकताच यशस्वीरित्या पार पडला. या कार्यक्रमाला हैदराबाद येथील रामकृष्ण मठाचे अध्यक्ष आणि इन्स्टिट्यूट ऑफ ह्युमन एक्सलन्सचे संचालक श्री स्वामी बोधमयानंद महाराज यांनी मार्गदर्शन केले.

गोकुळ शिक्षण प्रतिष्ठानचे अध्यक्ष तसेच एम.एस. रामय्या अप्लाइड सायन्स महाविद्यालयाचे कुलाधिपती डॉ. एम.आर. जयराम हे या सोहळ्याचे प्रमुख पाहुणे म्हणून उपस्थित होते. संस्थेचे कार्याध्यक्ष डॉ. प्रभाकर कोरे यांचीही व्यासपीठावर उपस्थिती होती. मान्यवरांच्या हस्ते दीपप्रज्वलन करून समारंभाचे उद्घाटन करण्यात आले.

यावेळी बोलताना स्वामी बोधमयानंद महाराज म्हणाले की, आजच्या जगात इतर ज्ञानांसोबतच अध्यात्मिक ज्ञान देखील अत्यंत महत्त्वाचे आहे. अलीकडे माणूस आपले आत्म-धैर्य गमावून बसला आहे. त्याचे मनोबल घटत चालल्यामुळे तो आत्महत्येचा मार्ग स्वीकारत आहे आणि रोज आत्महत्येच्या घटना उजेडात येत आहेत. अध्यात्मिक ज्ञान मानसिकतेला स्थैर्य देते. त्यामुळे आपले मनोबल वाढवण्यासाठी अध्यात्मिक विचार अंगीकारणे अत्यंत आवश्यक आहे. असे त्यांनी मत व्यक्त केले.

गोकुळ शिक्षण प्रतिष्ठानचे अध्यक्ष डॉ. एम.आर. जयराम यांनी यावेळी बोलताना सांगितले की, विद्यार्थी शिकून उच्च स्तरावर पोहोचतात, त्यामागे त्यांना ज्ञान देणाऱ्या शिक्षण संस्थेचे मोठे परिश्रम असते. संस्थेच्या सात संस्थापकांनी सुरू केलेले कार्य आजही अविरत सुरू आहे. त्यांनी दाखवलेल्या मार्गावर डॉ. प्रभाकर कोरे यांच्या नेतृत्वाखाली केएलई संस्था सातत्याने प्रगतीच्या पथावर वाटचाल करत आहे. अशा शब्दांत त्यांनी संस्थेच्या कार्याचा गौरव केला.

संस्थेचे कार्याध्यक्ष डॉ. प्रभाकर कोरे यांनी यावेळी सांगितले की, देशात शिक्षणाएवढेच महत्त्व आरोग्यालाही आहे. केएलई संस्था केवळ एका कुटुंबापुरती मर्यादित नसून, ती लोकशाही व्यवस्थेशी जोडलेली आहे. बॅरिस्टर नाथ पै, माजी केंद्रीय मंत्री बी. शंकरानंद, इन्फोसिसच्या सुधा मूर्ती यांच्यासह अनेक दिग्गज व्यक्ती केएलई संस्थेचे विद्यार्थी आहेत, ही आपल्यासाठी अभिमानाची बाब आहे.

समारंभात संस्थेच्या शैक्षणिक, सह-अभ्यासक्रम आणि क्रीडा उपक्रमांमध्ये राष्ट्रीय तसेच राज्य स्तरावर यश मिळवणाऱ्या विद्यार्थी व शिक्षकांचा सत्कार करण्यात आला. याप्रसंगी संस्थेचे कर्मचारी आणि विद्यार्थी मोठ्या संख्येने उपस्थित होते.