कागवाडचे आमदार राजू कागे यांनी उत्तर कर्नाटकला वेगळ्या राज्याचा दर्जा देण्यात यावा, यासाठी थेट पंतप्रधान नरेंद्र मोदी, राष्ट्रपती आणि राज्याच्या मुख्यमंत्र्यांना पत्र लिहिले असल्याची माहिती दिली.

बेळगाव येथे प्रसारमाध्यमांशी बोलताना त्यांनी ही बाब स्पष्ट केली. उत्तर कर्नाटक वेगळे राज्य झाले पाहिजे यासाठी पंतप्रधान, राष्ट्रपती आणि राज्याच्या मुख्यमंत्र्यांना पत्र लिहिण्याचा मुद्दा खरा असल्याचे त्यांनी सांगितले. ‘वेगळ्या राज्याची मागणी का करत आहे’ याची माहिती मी लगेच देणार नाही. योग्य वेळ आल्यावर ते स्पष्ट करेन. हिवाळी अधिवेशनात या मागणीसाठी आवाज उठवणार असून, या सर्व प्रकरणावर सविस्तर स्पष्टीकरण देणार आहे, असे त्यांनी म्हटले.