बेळगावात सार्वजनिक ग्रंथालय विभागाच्या ग्रामीण कर्मचाऱ्यांनी जोरदार निदर्शने केली. दर महिन्याला वेळेवर मासिक वेतन थेट खात्यात जमा करावे आणि अन्य सुविधा द्याव्यात; अन्यथा, आगामी अधिवेशनादरम्यान उग्र आंदोलन करण्याचा इशारा कर्मचाऱ्यांनी दिला.

आज बेळगाव शहरात सार्वजनिक ग्रंथालय विभागाच्या ग्रामीण कर्मचाऱ्यांनी एका भव्य रॅलीद्वारे जिल्हाधिकारी कार्यालयापर्यंत मोर्चा काढला आणि निदर्शने केली. या संदर्भात जिल्हाधिकाऱ्यांमार्फत सरकारला निवेदन सादर करण्यात आले.

ग्रंथालय विभागाचे कर्मचारी वेतन आणि सुविधांपासून वंचित आहेत. किमान वेतन देखील थेट खात्यात जमा केले जात नाही. १२ हजार रुपये रोखीने भरून उर्वरित वेतन धनादेशाद्वारे घेण्याचे आदेश आहेत, यामुळे अनेकदा वेतन थकते. कर्मचाऱ्यांचे वेतन तीन महिन्यांतून एकदाच दिले जात असल्याने त्यांच्या अडचणी वाढल्या आहेत. बंगळूर ग्रामीण आणि कलबुर्गी येथे दोन कर्मचाऱ्यांनी या त्रासाला कंटाळून आत्महत्या केल्या आहेत.

कर्नाटक ग्रामीण ग्रंथालय कर्मचारी संघाचे उपाध्यक्ष शंकरय्या मठपती यांनी सांगितले की, “दर महिन्याच्या ५ तारखेला वेतन जमा केले पाहिजे. आमच्या मागण्या पूर्ण न झाल्यास आम्ही हिवाळी अधिवेशनादरम्यान उग्र आंदोलन करू,” असा इशारा त्यांनी दिला.

यावेळी के. व्ही. सत्यनारायण, भारती नाझरे, के. सी. मोहन, शिवरामेगौडा, के. बी. रामनगौडा, पुंडलिक बालैय्यागोळ, श्रीराम डी यांच्यासह अन्य कर्मचारी सहभागी झाले होते.